Namar ka kynrum kynram bad ka jingthurmur ha ka rukom thungkam thungjam jong ka MPSC, ka Employment Monitoring Cell jong ka Khasi Students’ Union ka la buh dorkhas ha khmat u Myntri Rangbah jong ka jylla u Conrad K Sangma ba kum u nongialam un lah ban wanrah ka jingkylla ha ka rukom treikam ha katei ka ophis.
Ka Seng ka la buh ia 20 tylli ki mat jingdawa ban saiñdur bad pynbha ia ka rukom treikam ha ka MPSC.
Nalor kata, lashai ka sngi ka seng kan ai ia kane ka dorkhas sha baroh ki Seng saiñ pyrthei (Political Parties) jong ka jylla bad ki 59 ngut ki MLA khnang ba kin lah ban iathir iamir halor kine ki mat jong ka MPSC ha ka dorbar Assembly ka ban sa wan, ia kane ka kyrwoh la pyntip da u Reuben Najiar (Chairman Employment Monitoring Cell Khasi Students’ Union).