Ki Nongialam ka Local Truck Owners & Drivers Association mynta ka sngi ki la iakynduh ïa u Myntri Rangbah ka Sorkar jylla u Conrad K. Sangma uba la khot ïa kynduh ïa kane ka Kynhun halor ka mat jong ka jingkhang ka tnad Forest Department ban tih maw tih shyiap hapoh ka East Khasi Hills.
Ïa kane la pyntip da u President katei ka Kynhun u Bah Agentstar Kurkalang ha ka jingïakynduh bad ki lad pathai khubor mynta ka sngi ka 22 tarik Nailar 2024 da kaba ïathuh ba kala don ka jingïakynduh bad u CM kaba la long kaba seisoh bad kaba pynsngewtynnad ïa katei ka Kynhun.
Ha kaba u Conrad u la pyntip ban pyllait noh ïa ka jingtih maw tih Shyiap ryngkat ki kyndon kiba ba dei ban bud ryntih ba ym dei ban tih da kaba pynsniewdur ïa ka Mariang, bad ym dei ban pyntuid ia ki khyndew sha ki wah bad ym dei ban pynjot ïa ki Surok.
Shuh shuh la ïathuh ba ym donkam ban ai ïa ka Transport Challan na ka bynta ki Trok kiba kit ïa ki shyiap ki maw hapoh ki shnong ne ha ki District, hynrei kan ïaid tang ïa kiba kit bad shalan sha kiwei pat ki jylla.
Kum ban shu pynkynmaw ka Department jong ka Forest ha ki bnai ba la dep kala pynbna bad khang ïa ka jingtih maw tih Shyiap kaba la pynlong ïa kane ka kynhun ba kan hap ban sangeh halor kane ka rai kaba la ktah ïa ka kamai jakpoh jong ki nongñiah, ki Trai kali bad Trai Par Maw Par Shyiap.