U MDC ka party Congress, u Bah Pynshngain N Syiem uba long ruh u Deputy CEM ka KHADC, u la iathuh ba ka party ka la aiti ha u President ka Meghalaya Pradesh Congress committee (MPCC) bad ha ki nongialam ban bishar bniah la ka Congress kan dang iatreilang ne em bad ka National People Party (NPP) hapoh Khasi Hills Autonomous District Council (KHADC).
Lah ban kdew hangne, ba lai ngut ki MLA ki ba kynthup ia u Bah Charles Marngar, u Bah Gabriel Wahlang bad Bah Celestine Lyngdoh ki la iehnoh ia ka Congress bad pyniasoh sha ka NPP, u Bah Charles Marngar bad u Bah Gabriel Wahlang ki dei ki MDC barim jong ka Congress.
Haba kren sha ki ladpathai khubor, u Bah Pynshngain N Syiem, u la ong ba ha ka jingialang jong ki nongkitkam ka Congress , la mih ka mat jingiakren halor ka jingiatreilang ka Congress bad ka NPP, hynrei halor kane la aiti ha u President bad ki nongialam ka party ban bishar bad ban shim rai halor kane ka bynta.
U la ong ruh ba ka jingiatreilang jong ka Congress bad NPP ka long tang na ka bynta ban pynneh pynsah ia ka riti dustur, ka synshar khadar u Khasi, namar hapoh ka jingialam ka EC ba iatreilang ka Congress bad ka NPP la lah ban wanrah ia shibun ki bill, ki regulation, ki ba dang sahteng khamtam halor jingthmu ka sorkar pdeng ban pynkylla ia ka 6th schedule.
Haba kylli u la ong ruh ba kane ka jingialang hapoh KHADC kan ym don jingktah eiei ia ka Congress ha ka MDC election namar ki don bun kiei kiei ki ba ki paidbah ki bishar ban jied ia ki nongmihkhmat.
Halor ka jingmih noh ki lai ngut ki MDC congress ban pyniasoh sha ka NPP u la ong ba ym don eiei ban ong hynrei kum ka party hi kan trei shitom ban dang pynkhlaiñ ia ka party.