Ka KSU CEC ha ka jingialam jong u Samla Hopeful Born L. Mawnai bad Samla Eddie Malngiang Asst. Organising Secretary CEC ki la ioh ban pdiang burom ha ISBT Mawiong ia ki ‘rang bad ki ‘thei ialehkai iakhun kti (Armwrestling) kiba la wan ban iashim bynta ha ka World Armwrestling & Para Armwrestling Championship kaba long ha ka Ri Moldova.
Ha kane ka sngi la don ryngkat ban sakhi lang da ki dkhot ka KSU na ki circle bapher bapher bad ha ryngkat ka jingdon lang ki ba haïing ba hasem ki nongiashim bynta.
Ki don baroh 14 ngut na ka jylla kiba la ia leit mih khmat sha katei ka lympung, kata 2 ngut ki officials bad 12 ngut ki nongiashim bynta. Na pdeng kine ki nongiashim bynta, kiba la ioh ban khur ia ki takma ki long kumne ka Margaret Pathaw kaba la ioh ia ka takma Rupa bad kawei ka takma rnong ha ka thup 60 kilo, ka Senebi Syngkli kaba la ioh takma rnong ha ka thup 55 kilo, ka Mihsngewbha Rymbai kaba la ioh rupa ha ka thup 80 kilo (grandmaster), ka Starina Jasaiñ kaba la ioh takma rupa bad rnong ha ka thup 60 kilo (grand master) bad u samla Hubert Paliar uba la khur takma rnong ha ka thup 55 kilo (Hearing).
Na ka liang ka seng, ka la kitbok kitrwiang ia baroh ki nongialehkai ba lyngba kane ka rynsan kin nang lah shuh shuh ban pyntbit kham bha bad ba kin wanrah nam bad burom biang sa shisien ia ka jylla bad ia ka jaidbynriew hi baroh kawei.
