I Samla Angielia Marwein iwei na ki khynnah Pule Master Degree ha ka Political Science jong ka St Anthony College in mih khmat ia ka Jylla sha ka lympung jingiakop Femina Miss India 2024.
Napdeng ki 5ngut kiba iakhun ha ka Qualified Round ha Guwahati i Samla Angielia i lah shah jied marwei ban iakhun na ka Jylla.
Haba iakren sha ki lad pathai khubor mynta ka sngi ha press Club i Samla Angielia Marwein i pynpaw ia ka jingsngewkmen ban ioh iashim bynta ha kane ka rynsan bad ka dei ka sien ba nyngkong eh ba in mihkhmat na ka jylla sha kane ka Miss Femina India 2024 ka ban long ha Mumbai.
Ka khubor jong i sha ki samla jong ka jylla kiba kwah ban shim ia ka kam modeling kum ka jingsngewtynnad bad kum ka kam ka long ban bud ia ka dohnud jong ki, bud ia ki jingangnud jong ki, ki jingeh ki long ki bym lah dei lyngba ki mawjam kiba rit ba lah ban ioh ia kiei kiei kiba khraw ha ka jingim.
I pynpaw ruh ba in pyni ia ka Kolshor jong ka jylla ha ka rynsan ba heh bad i kyrmen ban wanrah ia ka pangsngiat sha ka jylla.