U Symbud Myntri Rangbah ka Jylla u ba long ruh u Chairman ka High level Committee (HLC) u la ong ba ha u taiew ban wan ka sorkar kan sa shong jingialang bad ki Ophisar ka tnad ban shim ia ka rai halor ka jingpan por ki nongialam ka Harijan Panchayat Commitee (HPC).
Haba kren bad ki ladpathai khubor u Bah Prestone u la ong hadien ba ka sorkar ka ioh ia ka jingkyrpad naki , yn shong shwa da ka jingialang ban ia kren halor kane bad mynta hi ym pat lah ban ong eiei halor kane ka mat namar nga dang donkam ban lum shwa da ka jingialang bad ki Ophisar ka Tnad.
Lah ban kdew hangne ba na ka Harijan Panchayat Committee (HPC) ha ka 26 Tarik Nailar 2024 ka la pan por haduh u bnai Nailur na ka bynta ban ai ka rai halor ka jingthmu (Blueprint) na ka bynta ban pynkynriah ia ki 342 ki longïing na Them Iew Mawlong. Kane ka jingpan por ka long hadien ba la kut ka por 15 sngi ba ka sorkar ka la ai por sha ka HPC naka bynta ban iamir jingmut bad ban shim rai khadduh halor kane ka mat.
Ha ka kyrwoh ba la phah da u Secretary ka HPC u Gurjit Singh, u la ong ha ka jingialang kaba la long ha ka 10 Tarik Nailar 2024 , ka sorkar ka la bthah ia ka Committee ba kan shim rai hapoh ar taiew, halor kane ka jingtyrwa ka Sorkar ha kaba na ka liang u nongialam ka HPC ka la kdew ba kane ka jingaipor ka sorkar ka dei kaba duna palat, bad namar ki kam ki bym lah lait, kim Shem pat ioh ka lad ban iamir jingmut, bad ki bor ba halor jong ka Sikh community.
U Gurjit Singh u la kdew ba halor kane ka rai u donkam ban ia kren shwa bad ki Jathedar na Sri Akal Takht Sahib, ka Shiromani Gurdwara Prabandhak Committee na Amritsar, ki Delhi Sikh Gurdwara Management Committee, bad kiwei kiwei ki nongialam Rangbah ka Community da kaba kdew ruh ba ka jingai jingmut jong ki , ka long kaba donkam.