Ka Silver Jubilee Celebration Committee jong ka Loompyrdi Iongpiah UP School ka la sdang ia ka jingrakhe naduh ka 27 tarik haduh ka 30 tarik Nailar kala ioh ban pynlong ia ki sngi lehkmen jong ki khynnah skul, kiba kynthup naduh ki Cultural Programme, Essay Writing, Drawing-Painting, Quiz bad Short Play Competition.
Ia kane ka Programme la pynlong ha Yungwalieh Loompyrdi Iongpiah, Jowai ha kaba la wan ban plie pyrda ia kane ka jinglehkmen Silver Jubilee da u ma Andrew Awhai Shullai, MDC Jowai Central kum u kongsan ha ka jingiadonlang u ma Saron Paswet, MDC Jowai South kum u Symbud kongsan, u Bimee R.L.Suwer, Waheh Chnong Loompyrdi Iongpiah, Nitu Shullai Headteacher Loompyrdi Iongpiah UPS bad kiwei de kiba la shah khot sngewbha.
U kongsan u Andrew Awhai Shullai haba kren, u la ai ka jingiaroh ia ka Dorbar Shnong kaba don ka jingiohi jngai na ka bynta ban sdang ia kane ka skul, kaba long ka shlem ai jinghikai kaba la iaid shakhmat kat kum ka juk mynta.
U ma Shullai u la ong ruh ia ki nonghikai ba nalor ka jinghikai halor ka pule puthi kaba ki la ai sha ki khynnah, kyrpang ruh dei ban saiñdur ia ki khynnah ha ka jingiadei bad ka longbriew manbriew kaba bha ba miat, khnang ba hadien habud ki khynnah kiba mih na kane ka skul kin long kiba don kata ka jingkitkhlieh na ka bynta ka bha kamiat ka imlang sahlang jong ka ïing ka sem, ka shnong ka thaw bad ka jaitbynriew hi baroh.
Ia ka jingialang la pyniaid da u Ribeit O Pde Chairman Organising Committee, ia ka jingnguh blei la ioh na ka kong Really Rymbai Assistant Teacher, la ioh ruh ia ki jingkren na u Saron Pswet MDC, ma C. Tympang Laloo Chairman SMC Loompyrdi Iongpiah bad Barleymore Shyll, Secretary Organisng Committee.
La pynphuh pynphieng shuh shuh ia kane ka sngi da ki jingiakop shad tynrai, iakop pyniriam bad kiwei de kiba la shim bynta da ki khynnah jong kane ka skul.
