U MLA ka Trinamool Congress, u Bah Charles Pyngrope u la ia jingmut ban pyntreikam biang ia ka odd-even system na ka bynta ki kali jong ki riewshimet na ka bynta ban pynduna ia ka jingdheng kali ha ka Nongbah Shillong, ia kane u Bah Charles Pyngrope u la kren hapoh ka Ïingdorbar ha ka sngi Balang jong u taiew.
Haba jubab ia ka jingkylli bynrap ba la wanrah da u Bah Pyngrope, u Deputy Chief Minister u ba long ruh u Myntri ka Tnad Transport jong ka Sorkar jylla, u Bah Sniawbhalang Dhar, u la ong ba ka Tnad kan sa bishar halor kane ka jingai jingmut.
Na ka liang u MLA ka TMC, u Dr Mukul Sangma ha ka jingkylli bynrap u la wanrah ka jingkylli halor ka mang tyngka na ka bynta ban shna ia ki jaka pynieng kali ha ka Nongbah.
Na ka liang u Bah Adelbert Nongrum, u MLA ka VPP u la wanrah ia ka mat halor ka surok kaba iaid lyngba ia ka Harijan Colony, ha ka ba na ka liang u Deputy Chief Minister, u Bah Prestone Tynsong u la ong ba ka Sorkar kan sa khot biang ka jingialang namar ba kane ka mat ka iadei bad ka suk ka saiñ.
U MLA ka VPP mynta ka sngi u la wanrah ia ka mat halor ka mat halor ka jingiada ia ka mariang hadien ba ka sorkar ka don jingthmu ban pynheh ia ki surok bad shna ia ki jaka pynieng kali ha Phan Nonglait Park bad Ward’s lake, halor kane ka mat na ka liang u Bah Dhar u la ong ba kin pyniaid ia kane ka projek khlem da pynjulor ia ka mariang.
Katba na ka liang u Bah Lahkmen Rymbui (UDP), u la ai jingmut ba ha ka jaka ban shna ia ka jaka pynieng kali ha Phan Nonglait Park, ladei ban pynheh ia ka Medical college ha kane ka jaka.
Haba jubab, na ka liang u Bah Dhar, u la ong ba ka projek ban shna pynbha ia ka Ward’s Lake ka dang don ha ka DPR stage bad ka Phan Nonglait Park projek ka dang don ha ka jingpynwandur thymmai ka ban shna khlem ot ia ki dieng ha kane ka jaka.