U Lalan S Amse uba dei u Mama jong u (L) Kynjaimon Amse (31), u don hapdeng ka jingartatien ia ka jingkhlad noh jong utei u pyrsa jong u, na ka jingtakhuh kali kaba la jia ha ka 23 tarik mynta u bnai ha ka shnong Dkhiah, East Jaiñtia Hills, kumta ula leit ban bun noh da ka ejahar ha ka 26 tarik ha Khliehriat Police Station, na ka bynta ban pynlong ia ka jingtohkit bniah halor kane ka jingjia.
Na ka liang u ma Lalan ula pynpaw ha ka ejahar ba ka lah ban don kano kano ka jingjia sha lyndet kane ka jingkhlad noh hashen u pyrsa jong u. U la ong ba katkum ki dak ki shin kiba paw na ka jingjulor jong katei ka kali ha ka liang ba shong u Kynjaimon kam lah ban lam shaduh ka jingkhlad noh jong u.
Katkum ka ejahar la pynpaw ba u ma Lalan ha ka por kumba 2:00 beje mynstep phyrngap ula ioh ia ka phone na u Suni Pdang uba la iathuh ba u Kynjaiman Amse ula iakynduh ia ka jingjia aksiden kali ha shnong Dkhiah, ka kali kaba don ia u Reg.No. ML 11 9405 kaba la niah da u Fullmoon Nongtdu uba na Khliehriat, ryngkat bad ar ngut kiwei pat ki kiba kynthup ia u Raja L Suchen bad u Small Lamin kiba na ka shnong Huroi, East Jaiñtia Hills kiba dang wan poi na ki thaiñ Ladrymbai bad iakynduh ia kane ka jingjia ha shnong Dkhiah.
Kumta na ka liang jong u ma Lalan uba buh ka jingkyntu ia ki bor jong ka aiñ ban bud dien bad tohkit bniah halor kane ka jingjia, khnang ban lap ia ka jingshisha baroh.