Ki MLA ka Voice of People Party (VPP) mynta ka sngi ka 29 Nailar, ki la mih jyndat napoh ka Ïingdorbar ban pynpaw ka jingpyrshah ia u Myntri ka Tnad pule puthi ka Sorkar jylla u Rakkam Sangma, u ba dang mut ban jubab ia ka half-an-hour discussion kaba la wanrah da u Bah Ardent Basaiawmoit halor ka phang thungkam nonghikai ha Dadenggre Sub Division.
Na ka liang u Bah Ardent, u kwah ba ka sorkar kan pynshitom ia u Myntri ka Tnad pule puthi, u Rakkam A Sangma halor ka jingiapher jaitbynriew, ha ka por ba don ka jingialap elekshon na ka bynta ka Tura Lok Sabha seat.
“Ngam kwah ban sngap ia u Myntri ka Tnad pule puthi, namar ka jingkren ban pynmih jingiapher jaitbynriew ka long pyrshah ia ka 196 jong ka BNSS, lada u Myntri Rangbah lane u Symbud Myntri Rangbah kim kren ia kane ngan ym treh ban sngap”.
“Lada ka sorkar ka shah ia u ne u Myntri ban jubab, ngin mih noh na kane ka dorbar, namar ngim kwah ba kan don ka jingiapher jingmut hapdeng u Khasi bad Garo”.
Na ka liang u Symbud Myntri Rangbah, u Bah Prestone Tynsong u la kdew ba ka rule ka ong ba ki dkhot ka Ïingdorbar kim lah ban kynthoh shimet ia uwei pat u para dkhot. Kumta kan bha ban shah ia u Myntri ba un jubab.
U Bah Tynsong u la ai jingmut ia ki MLA VPP ba kin ailad ia ka aiñ ba kan leh ia kaba donkam namar halor kane ka mat la dep ban ujor da ka Ejahar pyrshah ia u Myntri.
Hadien ba u Deputy Speaker, u Timothy D Shira, u la pynbna ia ka ruling ban shah ia u Myntri ka Tnad pule puthi ban jubab ha ka short duration discussion, u Bah Ardent bad ki lai ngut ki MLA VPP ki la ieng bad mih jyndat napoh ka dorbar.