Ka Meghalaya Awkening Concern Citizen (MACC) hapoh ka jingialam jong u President Rangbah u Bah Banshai Marbaniang mynta ka sngi ka 29/08/24 ki la wan ban pyntip paidbah halor ka jingkiewdor ki marbam mardih.
Haba iakren sha ki lad pathai khubor mynta ka sngi ha Shillong Press Club, u President jong ka MACC u la pyntip ba hadien jong ka jingwad bniah bad ha ka jingiaid sharum shaneng ban jurip ia ki iew ki hat ha ka jylla Meghalaya ki lap ba ka don ka jingkiewdor ha ki dukan marbam mardih ha ka jylla.
Hadien ba ka seng ka la shong jingialang bad katto katne ki Ophisar jong ka Meghalaya Legislative Assembly bad ki la ioh ban phah shithi sha baroh 59 ngut ki MLA, 2 ngut ki MP ka jylla, ka ophis DGP, ka consumer State forum bad kumjuh sha u Governor haba iadei bad kane ka mat.
Na ka liang u Bah Banshai shuh shuh u la ong ba ka jingkiewdor jong ki marbam mardih ka long kum ka jingban beiñ bad niewbeiñ ia ki paidbah khamtam ia u duk u suk. U la pyntip ba lada uno uno u MLA u kren ia kane ka jingkiew dor jong ki marbam mardih ka long ruh ka jingkyrshan na u bynta u paibah ba bun khamtam ia ki nongshong shnong ka jylla namar kane ka jingkiew dor jong ki marbam ka la long shaba palat.
Ha ka jingpynkut u la ong ba bun ki dukan ha iew ba die madan ki dei ki trai jylla bad ka dor jong ki ka iapher na kawei ka dukan sha kawei ka dukan, bad ynda wad jingtip na kiwei ki jylla baheh ba supply sha ka jylla kum ka Nagpur, Uttar Pradesh, Rajasthan bad na West Bengal u lap tang kawei ka dor ba wan sha ka jylla Meghalaya bad ynda poi ha jylla ka dor ka iapher bad u la ong ia ki ba Die madan ba kin pynlong da ka jingsngewthuh jingshemphang bad ym dei ban pynlong kum ki mraw ba hap ban thied namar hap pyrkhat ia u duk u suk u ba trei mynsngi bam da miet.