Ka jylla Meghalaya mynta ka sngi ka 2 tarik Nailur ka la pynlong ia ka jingialang jong ki myntri kam jngohkai pyrthei jong ka thaiñ mihngi bad shatei lammihngi bad ki jylla/ Union Territories kaba pyni ia ka sienjam kaba kongsan ha ka jingpyrshang ban iatreilang ban kyntiew ia ka kam jngohkai pyrthei ha kylleng ki jylla ka thaiñ mihngi bad shatei lammihngi kynthup ia ka Union Territory jong ka Andaman bad Nicobar Islands.
Ha kane ka jingialang la iadon ryngkat lang da u Myntri ka Sorkar Pdeng ba peit Ia ka kam jngohkai U Gajendra Singh Shekhawat, U Myntri ka tnad kam jngohkai ka Jylla U Bah Paul Lyngdoh, u Myntri khynnah ba peit kam jngohkai U Suresh Gopi, ki ophisar ka tnad Tourism na ka Sorkar pdeng bad na ka Jylla.
Kane ka jingialang kaba la thmu ban iasam ia ki jingshemphang bad ki buit kumno ban kyntiew ia ka kam jngohkai pyrthei ka la pynlong lang ia ki nongmihkhmat bad ki nongmihkhmat na ki katto katne ki jylla jong ka thaiñ Mihngi bad kumjuh ruh na ka thain Shatei Lam Mihngi bad Andaman bad Nicobar Islands.
U Shri Gajendra Singh Shekhawat, myntri jong ka tnad jngohkai pyrthei ha ka jingkren jong u ha ka jingialang u la ong, “Nga dei ban sngewnguh ia ka jingangnud jong ki jylla. Kawei pa kawei ka jylla ka la thaw ia ka thong.” U la pynpaw shuh shuh ba ki jylla ki la buh ia ka thong na ka bynta jong ki bad u la iaroh ia ka mynsiem iakhun hapdeng ki jylla. Hadien ba u la iohsngew ia ki jingkren jong ki jylla, u la ong ba ka dei kawei na ki jingialang kaba bha tam kaba u la leit haduh mynta.
U bah Paul Lyngdoh, myntri kam jngohkai pyrthei haba kren ha ka jingialang u la pynpaw ba ka jylla Meghalaya ka long kaba la kyrkhu da ki jaka ba itynnad kiba khring ia uwei pa uwei u nongwan jngohkai bad ka don ia ki krem kiba phylla, kynthup ia ka krem Mawmluh kaba la ithuh da ka UNESCO, kaba khring ia ki nongwan jngohkai pyrthei na kylleng ka pyrthei. “Katba kine ki jingphylla jong ka mariang ki batai ïa ka kam jngohkai pyrthei ha ka Jylla, ka tynrai bashisha jong ka Jylla Meghalaya ka shong ha ka jingsbun bad jingpdiang sngewbha jong ki briew jong ngi. Ngi ngeit ba ka jingkiew kaba don jingmut ka wan na ka jingpynkupbor ïa ki nongshong shnong, dei na kata ka daw ba ka jingïadon bynta jong ki paidbah ka long ka pdeng jong ki jingpyrshang jong ngi ha ka kam jngohkai pyrthei.
Ka kam jngoh kai pyrthei ka dei ka kam kaba ar kaba pynmih kam bad ai jam ha ka jylla Meghalaya, bad ka jingthmu jong ngi ka long ban pynkylla ïa ka Jylla jong ngi sha ka jaka jngohkai kaba ka India ka kham jied bha, ong u Paul Lyngdoh. Hynrei kane ka wanrah ruh shibun ki jingeh ïa ka jylla. Ki jaka jngohkai ba pawnam ha Meghalaya ki ju wan jngohkai da ka jingbun ki nongjngohkai pyrthei kaba buh ka jingkit kaba khia ïa ki spah mariang jong ka Jylla. Kane ka jingbym iahap ka nang jur shuh shuh namar ka jingduna ka jingpyniasoh bad ka jingbym biang ki jingtei, kum ki jaka sah bad ki jingdonkam ha kiba bun ki jaka jngohkai pyrthei.
Ka kam jngohkai pyrthei ha Meghalaya ym tang ba ka pynkiew ia ka roi ka par jong ka jylla, hynrei ka pynmih ruh da kaba ai kam ai jam ha kaba 50,000 tylli ki kam la ai ha ki snem ba lah leit. Ka Meghalaya ka la pynleit jingmut ruh ha ka kam jngohkai pyrthei kaba neh ha kaba ki jingthmu ba kongsan kum ka Community-Led Tourism Infrastructure Development Scheme, ka jingpynroi ia ka kam jngohkai pyrthei, bad ka jingpynbha ia ka jingpyniaid ia ki jaboh jabaiñ la iakren da kaba iatreilang bad ki nongshong shnong bad ki kam khaïi ban thaw ia ka rukom jngohkai pyrthei kaba kynthup lang bad kaba don jingkitkhlieh ia ka mariang bad kaba ai jingmyntoi ia ki nongjngohkai pyrthei bad ki nongshong shnong jong ka jylla.
