-Ki MLA Minister kin lah ban buh tang kawei ka kali tah itiong: SP East Khasi Hills
U Superintendent of Police ka EKHD, u Bah Sylvester Nongtnger, u la pyntip ba ka Shillong Traffic Police ha ka jingpynlong ia ka jingkynra ia ki kali ki ba tah ïit īong kaba la pynlong naduh ka 1 Tarik Naitung 2024 haduh ka 6 Tarik Nailur 2024 la ioh ban bat haduh 1788 tylli ki kali tah ïit īong bad napdeng kine 30 tylli ki dei ki kali Sorkar.
Haba kren sha ki ladpathai khubor mynta ka sngi (6 Tarik Nailur 2024), u Bah Nongtnger u la iathuh katkum ka hukum na ka Supreme court, la khang ban tah ia ki ïit īong lane ki Visual Light Transmission (VLT) ha ki kali.
“Ka Shillong Traffic Police ka la pynlong ia ka jingkynra ha kylleng ka sor Shillong bad ioh ban bat ia ki 1788 ki kali ki ba tah ïit īong bad la ioh ruh ban dain kuna T13 ,35,000, kane ka long naduh ka 1 Tarik Naitung 2024 haduh ka 6 Tarik Nailur 2024” la pyntip u SP .
“Ha kaba iadei bad ka jingkynnoh u Bah Ardent Miller Basaiawmoit, u MLA ka Nongkrem, u SP u la iathuh ba ha ka 22 Tarik Nailar, ki pulit ka traffic Mawlai ki dang pynlong ia ka jingkynra ia baroh ki kali ba tah ïit īong, bad ha kane ka por la wan ka wei ka kali Toyota Fortuner, bad ki pulit ki la pynsangeh lang ia kane ka kali kum ba leh ia kiwei, hynrei haba ki pulit ki la iohi ba ka dei ka kali jong u Bah Ardent u MLA ka Nongkrem, ki la pynlait noh hi khlem da check la u tah ïit īong ne em” iathuh u Bah Nongtnger.
“Kumba mih ha social media kam long kaba shisha, namar ha ba pynlong ia ka random checking bad haba pynsangeh ia ka wei ka kali kiwei ruh ki la sangeh namar ka surok kaba rit bad ngi khlem check kyrpang iano iano hynrei ia baroh hi” la ban biang u Nongtnger.