Ka Society for Urban and Rural Empowerment (SURE), ha ryngkat ka jingiatreilang bad ka Nongtalang College, ka la sdang ban ai jinghikai ha ki jingtbit bapher bapher sha ki samla pule degree jong kane ka kolej kaba don ha khappud.
Ha kane ka kynti, ka SURE ka ai ka Skill Development Training ha ka rukom shna jingbam, shna sabon, rep sboh, bad ri ngap ha ka jingiatreilang bad ka Nongtalang. Kane ka jinghikai ka long hapoh ka RUSA Equity Initiative Scheme. Ka burom ka leit sha u Dr. Ryan Reid Kharkongor uba la sdang ïa kane ka lad ai jinghikai na ka bynta ki samla pule jong kane ka kolej. Haba kren ha ka jingplie ïa kane ka jinghikai ha ka 9tarik September 2024, u Dr. Kharkongor u la pyntip ruh ba ka kolej ka ïatreilang bad ka Prime Meghalaya ban ai jinghikai ïa ki samla pule kumno ban long ki nongseng kam seng jam. Watla kane ka jinghikai ka long kaba lyngkot, hynrei u kyrmen ba kan iarap ia ki samla pule ban rai ia ka jait kam kaba ki kwah ban sdang.
U Dr. H.H. Mohrmen uba dei u Secretary ka SURE u la ïathuh ba kane ka NGO ka don ha ka jingiasnoh bad ka Meghalaya State Skill Development Society (MSSDS) kum ka nongai jinghikai, bad ki sngewkmen ban ïatreilang bad ka Nongtalang College. Kane ka NGO ka la ai jinghikai ia kiba bun ki samla ha ki kam bapher bapher.
Ar ngut na ki nongshah hikai kiba la shah hikai da ka seng trei mon sngewbha u Shri Leki Suting bad ka Amedora ki la ioh ia ka khusnam Skill Icon Award na ka MSSDS bad kawei pat ka khusnam Prime Meghalaya na u Conrad K. Sangma Myntri Rangbah ka jylla Meghalaya ha u snem ba la dep, u la ong. U kyrmen ba ki samla pule kin shimkhia bha ia katei ka jinghikai, bad kyrmen, kan iarap ban plie lad plie lynti ia ki ha ki kam kamai kajih ha ki por ban sa wan.
