U Deputy Commissioner & Chairman, District Disaster Management Authority, East Jaiñtia Hills District, Khliehriat ula ai ka jingpyntip paidbah ba na ka daw ba don ki jingkieng kiba don ha shilynter ka surok bah NH-6 kum ha ka shnong Tongseng, Sonapyrdi, Pyrtakuna, Umkiang bad ka shnong Rattacherra kaba hap hapoh ka Lumshnong C&RD Block ki don mynta ha ka jinglong kaba la sniew bha kaba lah ban wanrah ïa ka jingma kaba khraw ïa ki paidbah bad na ka bynta ki kali ba iaid lyngba.
Kumta khnang ban iada na kino kino ki jingjia ba sngewsih, ia ki nongleit nongwan, ki kali bad ki paidbah kiba iaid ha utei u surok bah, u DC ula bthah ia u Project Director, ka National Highway Authority of India (NHAI), Meghalaya, Shillong ban shim ia ki lad ki lynti ban pynbha mardor ia baroh ki jingkieng kiba don ha kitei ki bynta.
Halor kane ka jinglong jingman, la kyntu ïa ki paidbah, ki nongleit nongwan bad ki nongñiah kali ba kin shim ïa ki lad jingïada bad ban kohnguh ïa ki kyndon pynïaid kali haba ïaid lyngba ki jingkieng ba la kdew, khnang ban lait na kano kano ka jingjia kaba sniew haduh ban da pyndep ïa ki kam da ka tnad ba dei peit jong ka NH-6.
