Ka Khasi Author Society (KAS) mynta ka sngi 11 tarik Nailur 2024 ka la rakhe ia ka jingdap 45 snem bad la rakhe kyrpang mynta ka sngi ha Sankardev college.
Ha ka kane ka sngi la wan ban don ryngkat da u Dr Ricky AJ Synkon ha ryngkat ki nongkitkam ka Khasi Author Society, i Principal jong ka college, ki nonghikai, ki khynnah pule jong ka College, ki sengbhalang bad kiwei kiwei ki nongshah khot sngewbha.
Ha kane ka sngi la pyllait ruh ia lai tylli ki kot da u kongsan ba la thoh da ki riewshemphang bad ki dkhot jong ka Khasi Author Society. La sam khusnam ruh ia ki khynnah ba pass bha ha ka subject Khasi naduh ki khynnah matric, ki klas 12 bad ki samla pule.
Haba ai jingkren ha kane ka sngi na ka liang u MP jong ka Shillong u Dr Ricky AJ Syngkon u la ka pynpaw ban ïoh ïa ka jingithuh ïa ka ktien Khasi ha ka khyrnit ba phra ha ri India ka dei ka jingïakhun kaba eh bha bad na ka liang jong u Dr Ricky u la khot la wer ïa baroh ban ia trei lang ban pynurlong noh ïa kane ka mat kaba la sahteng la slem khnang ba ka jait bynriew kan ioh noh ka jingithuh ia ka ktien Khasi.
Shuh shuh kum uwei u dkhot jong ka Parliament u kmen ban iohi ïa kiwei ki MP ba ki kren da ka ktien lade kiba la ioh jingithuh hapoh ka ri India. Kum U MP u pynpaw ba ma u ruh un sa kren da ka ktien Khasi ha kawei ka sngi kum ba kiwei ki MP ki kren.
Shwa ban pynkut U la ong ruh ba ym lah ban len ba ka jingïaid lynti ka Khasi Authors’ Society ha kine ki 45 tylli ki snem ka la ïaid ryngkat kiba bun ki jingeh bad jingtynjuh bad ka la lah shisha ruh ban pynroi ïa ka thoh ka tar ha ka ktien Khasi, khnang ba ka jaitbynriew kan im.