Ka ïing bishar ba don burom jong ka High Court (HC) ka jylla Meghalaya kala aibor shwa shipor ha ka District Tourism Promotion Society (DTPS) ban pynïaid ïa ka kam jngohkai pyrthei ha Krang Shuri kaba hap hapoh ka Amlarem Sub-Division West Jaiñtia Hills District.
Ka HC kala hap ban leh kumne khnang ban ïaidbeit ka kam jngohkai pyrthei ha katei ka jaka, hadien bala mih ka jingïakhajia bad ka jingbymïabeit ka rukom pynïaid kam jong ki saw tylli ki Kur kiba hap hapoh ka ‘Raij Buam’ ba kynthup ïaka kur Buam, Khyriem, Surong bad Sumer, kiba ju peit ïa kane ka jaka.
Kumta ka HC kala bynshet ha ka tnad District Tourism Promotion Society (DTPS) lyngba Nodal Officer District Tourism Officer ban khmih nadong shadong ïa ka rukom pynïaid kam naduh ka rukom poi ki nongwan shangkai, ka jinglum pisa da kaba buh la ka jong ka Bank Account kaba ïadei bad ka District Tourism Promotion Society (DTPS).
Ka DTPS kan lum jingkheiñ kynthup ïa ka bai lifejacket, bai pynïeng kali, bai shong lieng nalor kiwei kiwei de. Ïa ka bai nong jong ki nongtrei ha katei ka jaka yn siew da ka pisa bala ïoh lum.
Ïa ka jingïoh bad ka jingpynlut yn sa Audit (Quarterly) da ka District Tourism Promotion Society (DTPS).
Ban kham shngaiñ shuh shuh ïa ki nongwan shangkai yn buh ruh ïa ki Pulit ban ap pahara ha katei ka jaka tad haduh ban da dep pynbeit ïa ka jingïakhajia jong ki khun ka Raij Buam.
Ka HC ka la bthah ruh ïa ka Executive Committee jong ka Jaintia Hills Autonomous District Council (JHADC), ba kan pynbeit ïa katei ka jingïakhajia hapdeng kitei ki saw kur hapoh ka Raij Buam.