Ka Voice of People Party (VPP) mynta ka sngi ka la pynlong da ka jingiakhih shongkyllaiñ myngngor ka ba shisngi ha Madan Malki , kum shibynta ban pynpaw ia ka jingpyrshah halor ka jingbym shimkhia ka Sorkar ia ka jingkiewdor ki marbam mardih ha ka jylla.
Ha ba kren sha ki ladpathai khubor,na ka liang u President ka VPP ,u ba long ruh u MLA ka Nongkrem u Bah Ardent Miller Basaiawmoit,u la ong ba ka jingmih ka VPP ban pynlong da ka jingiakhih ka long hadien ba na ka liang ka party kam shym la ioh lad ban iatai ia kane ka mat ka ba la ktah ia baroh ki nongshong shnong hapoh ka Ïingdorbar.
“Kum ka seng ka kwah ban buh ka jingkylli na ka Sorkar ia ka daw ba ka jylla ka hap ban mad ia ka jingkiewdor ki mar ki matta” ong u Bah Ardent.
U la bynrap, na ka liang ka Sorkar ka lah ban ai daw ba ka jingkiewdor ki mar ki matta ka lah ban long na ka jingbym don ki rel hynrei kane ka lah ban long tang kawei kadaw hynrei kam dei ka dawbah namar ka jingiapher ka la long shaba palat.
“Ka jingkiewdor ka dei ruh na ka jingbun palat ki khyrdop lum khajna shi lynter ka surok bah bad na ka liang ka sorkar kam shym la shim kano kano ka sienjam ban tehlakam ia kane” u la ong shuh.
U Bah Basaiawmoit , u la ong ruh ba haba phai sha ki nongrep ha ka jylla ka don ka jingshah khñiot dor ha ki marrep hynrei da la poi sha ki nongbam pat, kine ki juh ki marrep ki long ki ba rem dor, bad kane kaba ngi kwah ban buh jingkylli na ka Sorkar .
U la ong ruh ba na ka liang ka sorkar ka ju buh ia ki dor hynrei kam shym la shimkhia ban buddien ia kane, bad kane ka dei ka jingbym shimkhia ka Sorkar ban tehlakam ia jingkiewdor ki marbam mardih ha ka jylla kaba wanrah ia ka jingeh ia ki nongshong shnong ha ka jylla.