Ha ka 12 tarik mynta u bnai ka seng Jagatguru Shankaracharya Swami Avimukteshwaranda Saraswati (SSAS) ka la thmu ban pynlong ia ka press conference ha Shillong Press Club hynrei na ki katto katne ki daw ki la rai ban pynsangeh noh bad halor katei ka Shillong Press Club ka la shah kynnoh ki khlem ailad ban pynlong ia katei ka program. Watla katta ka SSAS ka la rai ban pynlong ia ka Yatra Gau Dhwaj ha ka 2 tarik jong une u bnai ban wan.
Halor kane la mih bun ki jingpyrshah na ka liang ki paidbah, ki nongialam saiñ hima bad ki seng Bhalang. U Dr. Ricky Syngkon uba dei u MP na Shillong hynne ka sngi ka 16 Nailur u la phah da la shithi sha u Myntri Rangbah ka jylla, Conrad Sangma ban ym ailad ban pynlong ia ka Yatra Gau Dhwaj ha ka 2 Tarik namar lada ailad ia kitei ki kynhun kan wanrah ka jingktah bad ka jingklumar.
Ha kaba iadei bad kane, kaei ka ka jingrai bad ka jingpyrkhat jong u Myntri Rangbah, hato un khang ia kitei ki kynhun namar ba ka jylla Meghalaya kadei ka jylla Khristan? Hato un khang ia ki na ka bynta ka shongsuk ha ka jylla ? lane hato un ailad ia kitei ki seng Hindu ban pyndep ia ka program jong ki namar ka ri India kadei ka ri kaba ioh Laitluid ban mane blei namar katkum ka khyrnit (article) 25-28 la ong ba kino kino ki jait niam ki lah pynbna ne phla, ban leh ia kano kano katkum ka jingpyniaid ka niam bad ban ailad ruh ban pyniar ia kino kino ki kynhun niam.
Bun ki paidbah ki buh jingkylli ha kaba iadei bad kane, hynrei ym lah ban len ba ka jylla Meghalaya kadei ka jylla kaba ieit ban bam doh Masi katba katei ka kynhun ka khang pyrshah ban bam doh ia ki masi bad ki la ong ba dei ban kheiñ kum ka kmie ka ri India.
Kaei ka jubab ba u Myntri Rangbah un ai bad rai halor kane khnang ba kan wanrah ia ka jingmyntoi arliang khlem da ktah iano iano?.