Ka Jaiñtia Students’ Movement (JSM) Western Region mynta ka sngi kala aiti ïa ka dorkhas ha u myntri ka tnad pule puthi jong ka sorkar jylla u Rakkam A. Sangma halor ka jingdonkam ban pynheh noh ïa ki building bad ban pynbun ïa ki Nongtrei ha kine ki jaka pule sorkar kiba kynthup ïaka Government Boys HSS, Government Girls Higher Secondary School bad ha Kiang Nangbah Govt. College, Jowai.
Katkum katei ka dorkhas ka seng kala pynsngew ha kine ki saw snem bala dep ki samla pule jong ka District ki ïa kynduh shibun ki jingeh ban leit pule ha kitei ki skul bad College sorkar. Kane ka kynthup naduh ka jingkhapñiah ki kamra klas, ka jingduna ki nongtrei kynthup iï ki nonghikai, ka jingbym lah ban pdiang lut ïa ki samla pule ha ki kyrdan Higher Secondary.
Nalor ka jingbym biang ki library, kiwei de ki jingduna ha ki rukom hikai haka liang ka Computer, ki jaka ïalehkai Sports, sa ka jingbym don ki Hostel ban pynsuk ïa ki khynnah skul kiba la hap ban sah ïing wai ha ka dor kaba heh, kumjuh ka jingduna ki Bus ha kitei ki skul bad College.
Na ka liang ka seng kala dawa jur na u Myntri ba un shim khia ïa kine ki jingdawa ka seng namar ka long kaba donkam kyrkieh eh mynta. Ha ka juh ka por kila dawa ïa ki Community College kiba hap hapoh ka Ri-Lum Jaiñtia ki dei ban pdiang ïa ki samla pule ha ki thaiñ ba ki don, khnang ban nym don ka jingduh klas jong ki samla manla u snem.
Ka seng ka kyrmen skhem ba ka sorkar kan shimkhia ïa kane ka jingdawa kaba dei hok jong ki samla pule ka District hi baroh kawei.