Ka jingiatreilang jong ki lai MDC, MDC Mynsngad Khanduli, MDC, Barato-Mukroh, MDC Saphai, lai Dolloi, Dolloi Elaka Chiliang Myntang, Dolloi Elaka Raliang, Dolloi Elaka Nongjngi, lem bad ka Hynñiewtrep Border Disputed Redressal Forum (HBDRF) kila pyndep ïaka la ka kamram ban pynsngewthuh ia ki pait nongshong shnong jong ka Elaka Labang Nangphyllut Pangam Raliang (Block-1) bad ïa ki paid nongshong shnong kiba don marjan bad ki jaka khappud shaphang u pud u sam ha ka shnong Umshangiar (Khanduli) ha ka 20. December 2021.
Hakane ka jingïalang la iadon lang u MDC Barato – Mukroh Bah Aiborlang Shadap , MDC Mynsngad Khanduli Bah, Dawan Lyngdoh, Dolloi Elaka Chiliang Myntang, Dolloi Elaka Nongjngi, ma M.M Thaiang Secretary Labang Nangphyllut Pangam Raliang Council (LNPC), Chandame Sungoh Chairman HBDRF, Trevor. R. Suchen Secretary JSU, Lamsuk Langstang Secretary HNYF, Ohibait Dkhar President KSU -Jaintia Hills ki riew rangbah jong ka thaiñ Namdong Khanduli lem bad ki Rangbah shnong Secretary Shnong na ki shnong bapher bapher jong ka thaiñ Labang Nangphyllut bad ki shnong ba marjan jong ka thaiñ khappud.
Iaka jingïalang la pynïaid da u Bah, Aiborlang Shadap kum u Chairman jong kane ka kynhun, la ïoh ïaka jingkren pdiang na u Rangbah shnong Umshangiar u Bah, Elias Siangshai.
La ioh ïaka jingkren na u Bah Chandame Sungoh Chairman – HBDRF ha ka ba u la ïathuh lyngkot shaphang ka jingleh donbor jong ka Sorkar Assam ha ka ba kala pynhap jubor ïa ka Elaka Labang Nangphyllut & Pangam Raliang naka Hima Khasi Jaiñtia (Meghalaya) sha ka United Cachar Mikirs Hills District (Assam) u Bah, Dawan Lyngdoh u khot bad kyntu ïaki paid nongshong shnong jong ka thaiñ Labang Nangphyllut Pangam Raliang bad kiba shong basah haki thaiñ khappud ban long kiba ïatylli ïaryntih bad ban iatrei lang naka bynta ban ïoh ia u pud u sam uba pura.
Naka liang ki arngut ki Dolloi, u Dolloi Elaka Nongjngi bad Elaka Chiliang Myntang ruh ki pynpaw ka jingsngew sih ïaka jinglehbor jong ka Sorkar Assam ha kaba kala kdiah jubor ia u pud u sam jong ka Elaka jong ki, kum ka Um khyrmi, Umlaphiah, Wanpung bad Rongkhelan na ka Elaka Chiliang Myntang bad kum ka Khliehmynlong, Langkyrcha, Sajieñ, Umpho, Lakaroi, Stonglapar na ka Elaka Nongjngi bad wat ka shnong Rtiang Sanphaw, Myn-i bad Mookoiram kiba danghap hapoh u pud u sam jong ka jylla Meghalaya ruh ka dang kamtrai jubor.
U Woh, M. M Thaiang u pynpaw ba u biang ki kot ki sla bad ki dulir ban pynshisha baka Block-1 kadei ka bynta jong ka Ri Khasi Jaiñtia bad ka kamram jong ka Sorkar Meghalaya-Assam haka jingïadei bad ka Block-1 ka long satang ban re-transfer kat kum ba la dep jurip lang da ki artylli ki Districts Councils ka United Cachar Mikirs Hills bad United Khasi Jaiñtia Hills Districts ha ka 23 , February, 1958 .
U Samla Trebor R. Suchen Secretary JSU, u ong ba kila dep ban iashong jingïalang bad ka sorkar Meghalaya haka 15. 12. 2021 ha Secretariat bad kila ai jingmut ruh ïaka Sorkar Meghalaya ba kadei ban pyrkhat janai bha hashwa ban shim iaka rai naka bynta ban pynbeit ia u pud u sam.
U samla rangbah u bah Lamsuk Langstang u la pynpaw ka jingsngew khia daka ba ong, ha ka jingbun briew, ha ka spah ka phew, ha ka jingnang jingstad ngi tam shibun ïaki Karbi katba ka jingiatylli ïaryntih pat ka duna bha bad dei na kata ka daw ba ki Karbi ki nud ban thombor lehbor ïaki paradoh parasnam jong ngi kiba don haki thaiñ khappud.
U Samla Ohibait Dkhar ruh u pynpaw ïaka jingkmen ba ka don ka jingïatrei lang hapdeng ki MDC ,ki Dolloi ,ki Sengbhalang , ki Rangbah shnong bad ki riewpaitbah naka bynta u pud u sam bad u pynpaw ïa ka jingkyrmen ba daka jingïatrei ngi lah ban ïoh ia u pud u sam kat kum ka nongrim bad ka hok jong ngi.
Ki Rangbah shnong bapher bapher naka thaiñ Labang Nangphyllut Pangam Raliang ki pynpaw ïaki jingeh bakhraw baki shah lehbeiñ haki Karbi naduh ba ki la hap haka jingsynshar jong ki. Ki pynpaw daka Wei ka sur ba ki kwah naduh dohnud ban wan phai biang sha Meghalaya kumba juh long naduh hyndai hynthai .