Ka met iap jong ka kong Niancy Riahtam ryngkat bad Erica Thabah ka khynnah ba 5 snem ka rta la lap na ka wah Nehu ha ka por 12 baje eiei mynta ka sngi ka 19 tarik u Nailur 2024 da ki khynnah ba thmu ban leit sum sha katei ka wah.
Lah ban kdew ba i kong Niancy Riahtam bad i Erica Thabah ki dei ki ba sah ha Dong Tariang A, Mawiong Umjapung.
Kat kum ka tyllong khubor la iathuh ba ka kong Niancy ka la ialam lang ia ka khynnah ba 5 snem ka rta ba dei ka khun jong kawei ka kong basah marjan ban leit sha mawiong ISBT mynin ka sngi ka 18 tarik ha ka por kumba 10 baje eiei mynstep ban leit peit ia ka ïing ba dang shna hynrei kine ki arngut ki khlem wan phai ïing shuh naduh kata ka por.
Na ka liang kiba ha ïing ha sem jong kane ka khynnah ki la pyntip sha ka shnong ha ka por 9 baje eiei mynmiet ba kine ki arngut ki khlem wan phai ïing bad na ka liang ka shnong ka la pyntip sha ki bor pulit ka Mawlai Outpost bad ka shnong ka leit wad ia kine ki arngut haduh 3 baje mynstep.
Hadien shi sngi ba jah la lap noh ia kine ki arngut da ki khynnah kiba thmu ban leit sum sha kane ka wah mar kumta ki la pyntip wud wud sha ki bor shnong bad na ka liang ka shnong ka la pyntip noh sha ki Pulit.
Hadien ba la lap ia kine ki artylli ki metiap na ka liang ka shnong bad ka Search and Rescue Team, Fire and Emergency Service bad ka Forensic ki la poi sha kane ka jaka ban sei ia ka met jong kitei ki arngut.
Kat haduh ba pynmih ia kane ka khubor ym pat tip ia ka daw ka jingiap kine ki arngut bad ki pulit ki dang pynlong ia ka jingtohkit.
