Ka SAN-KER hynne ka sngi ka la rakhe ïa kane World Alzheimer’s Day da kaba pynlong ïa ki jingïaid kjat bad ki prokram pynsngewthuh paidbah halor ka jingpang Alzheimer. Iaka ‘World Alzheimer’s Day’ la rakhe man la u snem ha ka 21 tarik u Nailur ban pynsngewthuh shaphang katei ka jingpang bad ka jingduna jingmut jingpyrkhat. Ka thmu ban pynduh ia ki jingsngewthuh bakla kiba don sawdong jong kine ki jinglong katba ka ai jingkyrshan ia ki longïing kiba shah ktah. Ka phang pdeng na ka bynta u snem 2024 ka long “Ka por ban leh pyrshah ïa ka jingpang jingmut jingpyrkhat.”
Mynta u snem la pynlong ia ka jingialang ha ka jaka jong ka SAN-KER, Mawlai Mawroh ha kaba ki nongtrei jong ka jaka sumar DAY-CARE ki la pyni ia ka skit kaba la pynpaw ia ka jingkit kaba khia jong ki nongsumar bad ka jingdon jingiarap hangne ha ka nongbah jong ngi.
Ka jingpang Alzheimer’s ka dei ka jingpang ba pynsniew ia ka jabieng kaba pynlong ia ka jingduh jingkynmaw, ka jingeh ha ka jingmut jingpyrkhat bad ka jingkylla ha ka jinglong. Ka dei ka jait jingpang ba kham paw, kaba iaid lyngba lai tylli ki bynta ba kongsan – kaba jem, kaba pdeng bad kaba jur, kawei pa kawei ka don la ki jong ki dak.
Kine ki paw da ka jingtlor suki suki jong ki cell jong ka jabieng, kaba ktah ia ka jingpyrkhat bad ka jingtreikam jong ka jingkynmaw. Katba ym pat don dawai na ka bynta ka jingpang Alzheimer’s, hynrei ki don ki lad jingsumar ban pyniaid ia ki dak jingpang.
U Dr. D. Khonglah, M.D (Psych) u la ai jingkren halor kane ka phang katba u Dr. Gideon Rynjah u D.M. (Neuro) u la batai bniah shaphang ki jingpang jingmut jingpyrkhat ha ka jinglong kyllum bad ka jingpang jingmut jingpyrkhat khamtam.
Ka Deputy Commissioner of Person with Disabilities, ka Kong Bridget Warshong ka la kren halor ka hok jong ki briew kiba don jingduna ha ki dkhot met bad ka jingdon ki skhim myntoi bad ki jingthmu jong ka sorkar ban pyntreikam ïa kine.
U Kongsan, u Bah Brightstarwell Marbaniang, MLA ka Mawlai u la ban jur ïa ka jingdonkam jong kum kine ki prokram ban weng ïa ka jingartatien bad ban lait na ka jingshah niewbeiñ kaba don ha kum kine ki jingpang bad ka jingsumar ïa ki.
U la kren shaphang ka jingdonkam ban weng ia kane ka mat mynta bad ban pyrshang bad noh synniang sha ki jingwad bniah kiba dang iaid shakhmat.
Kane ka donkam ia ka jingpyrshang jong ka imlang sahlang bad ki jaka kum ka SAN-KER ki hap ban ioh jingkyrshan, khlem da klet ia ki nongsumar kiba kit ia ka jingkit kaba khia jong ka jingsumar.
Ha kane ka jingialang la iashim bynta bha da ki ophisar ka koit ka khiah, ki nurse, ki samla pule, ki nongtrei bad kiwei ki seng trei mon sngewbha wat na Jowai ruh. Ïa kane ka jingïalang la pynïaid da ka kong, Carrie Lyngdoh Nongbri kaba la ai ruh ïa ka sur ai khublei.