Ka sur ki paidbah hapoh ka JAC jong LAI POLLING STATION ba kynthup ia ka Misei, Mawsmai bad Langdongdai, mynta ka sngi ha ka PUBLIC MEETING ka la pynsawa jam biang sa shisien ha ka shnong Nongmisei na ka bynta ka jingpyrshah ia ka jingpynhap jubor ia ki 21 tylli ki shnong ba hap ha ki Lai tylli ki PS sha Rambrai Jyrngam Constituency na Mawshynrut Constituency na ka bynta ka election MDC ban wan.
Ka sur jong ki 21 tylli ki shnong ba hap ha ki Lai PS (Misei, Langdongdai, Mawsmai) ka ieng ban pyrshah jur bad lada ka KHADC kam pynneh ha Mawshyrut Constituency nangne sha khmat ki paidbah ha ka jingialam ka JAC ki lai tylli ki polling station kin sa nang pynjur shuh shuh ia ka jingiakhih kaba jur.
Ha ka jingai jingkren kiba bun ki la pyngsngew ia ka jingpyrshah ia ka jingpynhap jubor da ka Selection Committee khlem da sngap ia ka sur jong ki paidbah.
Ha ka jingiashim bynta ha ka jingai jingkren ha ka Public meeting mynta ka sngi na ki sengbhalang ka thaiñ ki la buh ia ka jingkylli ia ki MDC bad MLA ka thaiñ hato don aiu shalyndet jong ka jingsngap man man jong ki halor kane ka jingdawa bashong nia jong ki paidbah ki 21 tylli ki shnong.
Ki Paidbah lyngba kane ka Public meeting ki la pynpaw ia ka jingsngewdiaw bad jingsngewsih shikadei eh halor ka jingeh dohnud ka KHADC ban ai rai ban pynneh ia Lai tylli ki PS kiba don 21tylli ki shnong lyngba ka Selection committee wat hadien ki Nongialam ka JAC KI LAI PS ki la pynher da ki jingthoh arsien arwat bad leit iakynduh ruh markhmat ia u Chairman ka selection committee u Bah P. N. Syiem.
Ka Sur ki sengbhalang ha ka jingai jingkren mynta ka sngi ki la kren shai ba kin kyrshan ia ki 21tylli ki shnong ban neh beit ha Mawshynrut Constituency ym ban pynkynriang sha Rambrai Jyrngam.
Ka Sur jong ki 21 tylli ki shnong lyngba ka Public meeting mynta ka sngi ka phah ia ka kyrwoh kaba shai sha u Bah P. N. Syiem bad ka selection committee ba lada kim sngap ia kane ka jingdawa ki paidbah na ki 21 tylli ki shnong ki la rai mynta ka sngi ban leit tur paidbah shaduh sha KHADC Shillong bad lada jia eiei ka KHADC bad ka selection committee kan shim ia ka jingbah khlieh.