Ki nonghikai SSA hapoh ka lama jong ka Laskeiñ Block ‘Meghalaya SSA School Association’ (MSSASA) Unit mynta ka sngi ki la ïalum lang ha nongbah Jowai ban phah syndon da ki shithi lyngba ka tnad Post Ophis Jowai ban pynpoi khnang khnang sha u myntri ka tnad pule puthi u ma Lahkmen Rymbui halor ka jingduh tulop jong ki kaba la san bnai mynta.
Uwei na ki nonghikai SSA ula ong ka jingwan jong ki mynta ka sngi ban pynlong da ka ‘Letter Campaign’ ka long shi bynta ban pynsngew ha u Myntri ïa ki jingeh ki nonghikai SSA kaba ki ïakynduh manla ka sngi naduh ka bai skul ki khun, ka bam ka dih bad kiwei de ki jingdonkam.
Ula buh jingkylli ruh ïa ki nongmihkhmat khamtam ïa u Myntri ka tnad pule puthi da kaba ong lada jia ma ki ruh ki duh tulop haduh 5 bnai kynthih, tip kaei ka ban jia ïa ki ha kum kine ki por ka aiom lehkmen?
La pynkymmaw ha kine ki bnai ba la dep kum ki nonghikia SSA ki la dep ban pynlong ïa ka Rally ha nongbah Shillong bad na ka liang ka sorkar ka la pyllait ïa ka tulop kaba ar bnai bad na katei ka tulop kaba ar bnai tang ban siew ram ruh kam dap satia, pynpaw utei u nonghikai.
Kila pynrem jur ïa u myntri ba peit ïa ka tnad pule puthi ka sorkar jylla da kaba ong balei um lah ban peit ïa kane ka jingeh jong ki bad la sngew dei ïa u ba un hiar shuki noh namar ki don bun kiba tbit ban bat ïa katei ka kam myntri’.
Sa kawei ka nonghikai SSA na West Jaiñtia Hill kala ong ka jingwan jong ki mynta ka sngi ka long da ka mynsiem jong ka jingsngewdiaw bad ka jingsngewsih kthang kum ki nonghikai SSA jong ka jylla baroh kiba la don haduh 12,541 ngut.
Ki la pynsngew ruh kiba bun na ki longïing hakum kane ka por jong aiom lehkmen Christmas kila khmih lynti ban ïoh pynthied jaiñ ne u Cake Christmas bad New Year ïala ki khun ki kti, hynrei kane kala pynsngewsih pynban ïa ki kum ki kmie ki kpa kiba dei ki nonghikai SSA namar kim ïoh lad satia ban pynhun ïa ka jingkwah ki khun.
Sa kawei ka jingeh ka long ba ki skul kila sdang biang ïa ka pule puthi ha kine ki bnai ban wan bad kane kan buh jingeh ïa ki ban siew ïa ka bai skul khamtam ïa kito kiba phah skul khun sha ki skul jong ki riew shimet bad ka jingsiew ka long kaba rem.
Kitei ki nonghikai SSA ki buh ruh ka jingkyrpad naduh u Myntri Rangbah bad kumjuh ïa u Myntri ka Pule Puthi ka jylla ba kin peit lem ïa kane ka jingkyrpad namar katba dang mih ki sngi kum ki nonghikai SSA ki dang ïa kynduh jingeh ha ka liang ka jingai jinghikai ïa ki khynnah skul kiba dei ki lawei ba phyrnai ka Ri.