Ka Khasi Students’ Union, Employment and Monitoring Cell ha ka 24 tarik Nailur, 2024 ka la leit ban buh jingujor hakhmat ka Kong N. Nongkynrih, Director jong ka Directorate of Forensic Science halor ka jingkhot aplikeshon lyngba ka Meghalaya Public Service Commission (MPSC) ka ba la pynlait paidbah ha ka 19 tarik Nailar 2024 halor ka jinglait ki post Scientific Officer, Senior Scientific Assistant bad Scientific Assistant in the Mobile Forensic Crime Scene Unit ha kaba na ka liang ka Directorate ka la iaid lait na ka Schedule II jong ka Rule 8 ka Meghalaya Forensic Laboratory Service Rules 2021 da kaba buh kyndon ba ki nongaplai ki dei ban pyndep ia ka M.Sc ha ka Forensic Science.
Katkum ka aiñ, kino kino ki kandidet kiba la pyndep ia ka M.Sc ha kano kano ka stream jong ka science ki lah ban aplai ia kine ki post, hynrei ka Directorate ka pynkylla ia kane khlem da don kano kano ka kyndon ba biang, iathuh ki dkhot ka KSU.
Ka KSU ka la kynnoh ba kane ka jingleh na ka liang ka Directorate ka wanrah iaka jingkhanglad iaka hok ki Samla ki ba pass ia ka M.Sc na kiwei pat ki subjects, katba ka Services Rule bad kiwei ki Directorate jong ki Jylla bapher bapher ki shah ia ki ban aplai.
Ha kane ka jingiakren na ka liang ka Director ka lah iathuh ba kane ka jingpynkylla ka dei lyngba ka jingbthah ktien u Secretary ka Home Department kaba la pynlyngngoh ia ka Seng ba kumno kat ka Directorate ka dang hap ban pdiang ia ka jingbthah ktien na ki ba nalor haba iadei bad kano kano ka jingpynkylla thymmai ia ka rukom treikam.
Ka Seng ka la pynshai ruh ba kam lah ban pdiang ia kane ka jingleh da ka Directorate ban iaid lait naki kyndon thungkam ba la don lypa, kaba long ka jingkhanglad ia kiwei ki samla wad kam wad jam, bad kumjuh kane ka jingleh ka pyni ba ka don ka jingpyrshang ban pynhun ia ki heh sorkar ha ka jingpynrung kam da kaba iaid lait ia ka Services Rule.