Kum shibynta ban pynurlong ia ki mat jingdawa kiba la sah teng la bun snem, na ka liang ki nongialam ka Khasi Students Union, (KSU) ha ka 25 Tarik Nailur 2024, ki la leit ban iakynduh ia u Lat ka Jylla u C. H. Vijayashankar, ban phah tuklar sha ka Sorkar Jylla bad ka Sorkar padeng.
Haba kren sha ki lad pathai khubor, na liang u General secretary ka KSU, u Bah Donald V Thabah u la iathuh ba kane ka jingiakynduh ka long ban phah tuklar halor ki 7 tylli ki mat kiba kum ka Jylla ka donkam, kaba kynthup ia ka jingdawa ban pyntreikam ia ka Bengal Eastern Frontier Regulations (BEFR) 1873 lane ka Inner Line Permit (ILP) habaroh kawei ka Jylla Meghalaya, da kaba kdew ba ka ILP ka long ka aiñ kaba treikam ban ialeh pyrshah bad ban pynbeit ia ka jingrung jong ki briew kiba nabar sha ki jylla ha kaba ki nongshong shnong trai ri ki long kiba rit eh ha ka jingbun briew.
Ka seng ka la pynsngew ruh halor ka jingdawa ban pyndam noh ia ka ‘Amendment to the Citizenship Act 2019’. Kane ka aiñ kaba ailad ban wan buhai shnong ha ka Ri India , halor kane ka seng ka la kdew ba Ka Meghalaya ka kit ia ka jingkit kaba khia jong ka jingwan buhai shnong be-aiñ naduh ba sdang ka thma pynlaitluid Bangladesh ha u snem 1971 haduh kine ki sngi. Ka KSU ka la kyrpad na u lat ka Jylla ban tuklar bad ka Sorkar Pdeng na ka bynta u snem 2019. ka jingpyndam noh ia ka CAA khnang ban iada ia ki jaitbynriew trai ri kiba rit eh jong ka jylla bad ka Thaiñ Shatei Lam Mihngi.
Ka KSU ka la phah tuklar ruh halor ka Indo-Nepal Friendship Treaty 1950 , haba kren halor kane ka mat u Donald V Thabah, u la ong ba kane ka Treaty ka ailad ia ki jaitbynriew Nepali ban wan buhai shong sha ka Jylla Meghalaya khlem da buh kyndon eiei , kaba ktah pat ia ka shongsuk shong shngainñ ha ka Jylla .
“Naduh ki snem 1980, ka Meghalaya ka la ïohi ïa ka jingkiew ha ka jingdon ki Nepali ha ka Jylla kaba buh jingma ia ki paid riewlum ha ka Jylla, ka KSU ka don ka angnud ba ka jylla Ka dei ban weng noh na ka jingsynshar jong ka jingiateh paralok Indo-Nepal 1950 bad kan wad ia ka jingiarap ba mardor” ong u Bah Thabah.
Kawei ka mat ba ki la rah ha khmat u Lat ka long halor ka jingiakajia pud bad ka Assam, ban btin lynti lang ia ki sorkar jong ki ar Jylla hapdeng kane ka jingiakren ban pynbeit u pud u sam , namar haduh mynta ki jaka ha khappud ki don hapdeng ka jingiakynad .
“Ngi la ioh ruh ban iakren ban buh ka Central Agricultural University hapoh ka Jylla Meghalaya , halor kane na ka liang ka Sorkar pdeng ha u snem 2010 ka la rai ban shna noh ia ka University hapoh Meghalaya bad shim ruh ia ka jaka kaba 200 akar ha kyrdem kulai , hynrei ha u snem 2019 ki la pynbna ban seng noh da ka Agriculture College ha Imphal ka ban iateh lang bad ka University, ka seng ka la pynsngew ba lada ka Jylla kan ioh ia ka University hapoh ka Jylla kan iarap ia ka Jylla haki ba bun ki liang khamtam ha ka jingioh kam ioh jam” la ong biang u GS ka KSU.
Ka jingpynrung ia ka ktien Khasi hapoh ka khyrnit ba 8 (8 schedule) kane ruh haduh mynta ka dang sah tang ha ka jingbishar bniah , kumta ki la kyntu ia u Lat ban shimkhia ban tuklar lang bad ka Sorkar khang ban lah ban pynurlong noh ia kane ka mat bad nalor kine la ioh ruh ban ia kren halor ka kynrum kynram ka MPSC khamtam halor ka MCS bad ai ruh ia ka jingaijingmut ban pynbha ia ka jingtreikam kane ka shnat treikam sorkar.