Haduh 36 ngut ki samla ba kynthup ïa 22 ngut ki shynrang bad 14 ngut ki kynthei kila pyndep ïa ka jingshah hikai ba 45 sngi, haka 2nd Batch na ka jaka ai training jong ka Muksor Private Security & Services’ (MPSS) kaba don ha Thadmuthlong-C (Phramer) West Jaiñtia Hills District ban long kum ki Security, haka jingïalang leh burom (Pass Out Parade) kaba la long ha kane ka 26.09.2024 ha ka jaka ai jinghikai. Ka Muksor Private Security & Services’ (MPSS) ka dei ruh kaba la ithuh da ka Home Police jong ka sorkar Meghalaya.
Ha kane ka prokram leh burom ïa kitei ki samla la pynbam smai ïa ki da u Managing Director u trai jong ka MPSS ma P. Muksor, haka jingïadonlang u ma Pyrkhat Shylla kum u kongsan, ma Sop Sympli symbud kongsan, Rev. K. Lamare, bah J. Syiem, ki kmie ki kpa jong kitei ki samla nalor kiwei de kiba la shah khot sngewbha.
U ma P. Muksor ula ïathuh ba kane ka jingai jinghikai ïa kitei ki samla ka long kum ka jingsdang ïa ka kam ka jam jong ki ha ka liang ka Security, nangne kila ïoh shibun ki jinghikai haki rukom kilan met bapher bapher, ka rukom treikam bad ka akor ka burom.
Kitei ki samla kiba la dep ban shah hikai kan pynsuk shibun eh ïa ki ban wad ïa ki kam Security nalor ka jingdon jong ki syrnot (Certificate) kiba la pynithuh da katei ka jaka hikai MPSS.
Ha kane ka sngi la sam ruh ia ki award sha u Welborn Phwa Senior Security, Y. Pakma, ka R. Suiam bad ka L. Dkhar kiba la shah pynkup burom kum ki Best Leader bad Security ha ka duty jong ha ka Durap Cup ha Shillong.
U Kongsan u ma P. Shylla u la ai ka jingïaroh ïa u ma P. Muksor uba la don ïa kane ka mynsiem bad ïalam lynti ïa ki khun samla haka lad ïoh kam ïoh jam ha kum kane ka pyrthei kyrduh kam, u la kyntu ruh ia kiba la pass ia kane ka jingai jinghikai bad kin kiba don burom bad akor.
Kiba bun na kiba kren ha kane ka jingialangki la ai mynsiem shuh shuh ïa u ma Muksor ba un dang ïaid shaphrang ha kane ka kam bad ban ai ka jinghikai kaba kham bha shuh shuh ïa ki samla kiba thrang ban wan shah hikai ha kane ka jaka kaba don ha Thadmuthlong-C, Phramer West Jaiñtia Hills District.
La pynphuh pynphieng ïa kane ka sngi da ki jingïaid parate, ki jingshad, jingrwai, ki jingkilan met bala shim bynta da kitei ki samla ba la pyndep ïa kane ka jingai jinghikai.
