Ki dkhot jong ka Khasi Student Union (KSU) bad Jaintia Student Union (JSU) ryngkat ki samla ba thoh exam nurse mynta ka sngi ka 30 tarik Nailur ki la iakynduh ïa ka myntri ka tnad ka koit ka khiah ka Dr M. Ampareen lyngdoh halor ka jingbym hun ia ka result Nurse ba dang shu mih shen.
Haba kren sha ki lad pathai khubor na ka liang u samla Ruben Najir Chairman ka Employment Monitoring Cell KSU u la pynpaw ba dei ban pynduh noh ia ki result kiba dang shu mih ha ka 28 tarik Nailur bad dei ban pynmih Ia ki marks jong baroh 6 hajar ngut ki samla kiba thoh ia ka exam nurse ba dang shu dep bad ia ki samla kiba dei ban ioh ia ka hok kumba ki thoh ha ki paper ki lah ban complain sha ka grievance cell bad na ka liang ka department kan sa pynshai ia ka email id sha ka grievance cell bad ki hap thoh ban ioh Ia ka omr sheet khnang ba kan long kaba shai kdar bad kan nym don kano kano ka jingthep kam tuh. Na ka liang ka seng KSU ka iai ban ba kano kano ka jingthep kam kan long kaba khuid kaba suba bad ngim kwah ba kan don kano kano ka jingnohshiliang iano iano ruh.
Na ka liang u General Secretary ka Jaintia Student Union u Samla Trebor Suchen u la pynpaw ba ka jingdkoh halor ka thung kam nurse kam dei shuh kaba phylla na ka por sha ka por ka shait jia beit kumne. U pynpaw ruh ba ka sorkar ka triem palat ban pynlong programme bad ki concert bapher bapher, ynda la poi thep kam thep jam ki samla pat ki kulmar lut baroh, 6 hajar ngut ki samla thep kam nurse ha ka jylla jong ngi. Kane ka dei ka jingkhein sting ia ki khun samla ka jylla bad la shu kwah lang ia ki khun samla ban biria sha ki concert ki bym don ia ka lawei, ka sorkar kam kwah ban shna Ia ki aiñ ban don kata ka thung kam thung jam kaba khuid, bad hadien ka jingiakynduh bad i myntri in sa tip ba ka don kata ka Grievances Cell ban complain sha kata halor ka exam nurse. Na ka liang ka JSU ki la dawa ban pynduh noh shwa ia kane ka physical verification bad dei ban ailad shwa ia kine ki samla kibym shym pass ia ka exam bad ki don kata ka jingthut halor ka rukom pyniaid ia ki exam nurse jong ka post staff nurse bad ANM.ka seng ka pdiang ban ailad shiphew sngi ba kin file ia ka complain sha ka grievances cell bad ka sorkar ka dei ban don ka jingkit khlieh na ka bynta ki khun samla bad ym dei ban pynbeij da ki rongphong ba shipor ia ki khun samla jong ka jylla.
Na ka liang i Dr Ampareen Lyngdoh i la ong ba katkum ka Meghalaya Medical recruitment board kaba la shna mynshem snem i la ong ba kane ka board ka peit beit tang ia ki kam ba iadei bad ka medical grounds bad kam pat don ka rule bad regulation haba iadei bad ki staff nurse medical bad kiwei kiwei namar ki rule & regulation ki don tang ha ki ophisar jong ka tnad ka koit ka khiah bad i la ong ba ha ki khyndiat sngi yn sa pyllait noh ia ki marks baroh bad ia kito ki samla kiba ioh duna marks ki lah ban complain sha ka medical Board jong ka grievances cell bad kan sa pynshai ia ki marks ba ki ioh ban kin sa pynmih ia ka result katkum ka vacancy post.