Ka ophis treikam jong u District Medical & Health Officer, West Jaintia Hills District, lyngba ka AYUSH Department ka la ioh ban pynkut noh ia ka jingleit pynsngewthuh kaba shibnai lynter ia ka prokram Rashtriya Poshan Maah (National Nutrition Month) halor ka phang pdeng kaba ong “POHSHAN BHI PADHAI BHI (NUTRITION WITH EDUCATION) ha ka 30 tarik mynta u bnai ha ka skul Khim-U-Sniang Govt. LP School, Jowai, West Jaintia Hills District.
Haba pynkut ia kane ka jingrakhe ka tnat AYUSH kala wan ban pynlong ia ka jingialang bad ka jingai jinghikai ban pynsngewthuh sha ki khynnah skul jong ka Khim-U-Sniang Govt. L.P. School, Jowai. Ha kane ka sngi la wan ban ai jinghikai da ka Dr. (Mrs) B.T. Hinge iba dei i District Nodal Officer AYUSH, ha ka jingiadon ryngkat ki nongtrei na katei ka tnad treikam.
Ka Dr. Hinge haba ai jingbatai sha ki khynnah skul, kala iathuh ia ka jingdonkam ban tip kumno ban bam ia ki jingbam kiba tei met kum ki khynnah skul. “Haoid ki don shibun ki jait jingbam ki bym tei met hynrei ki long kiba bang bad kiba khring ia ki khynnah bad wat ia ki rangbah ruh, hynrei kum ia kine dei ban bam tang teng teng khnang ba kan ym ktah ia ka koit ka khiah jong phi” la ong ka Dr. Hinge. Na ka liang ka Dr kala pyni shibun ki nuksa bad ki jait jingbam kiba pynioh bor ia ki khynnah, kum ki soh, ka kait bad ki jhur ba bun jait. Ka Doctor kala pynsngewthuh halor ka jingdonkam ban thung ia ki jait jhur bad jait soh kiba pher bapher ha ki kper skul, khnang ba ki khynnah kin ioh ban bam na kine ki jingthung bala thung ha ki kper khlem da pyndonkam ia ki sboh dawai (Chemical) bad kin long ki jingbam kiba pynmyntoi ia ki kum ki khynnah skul.
Ha kane ka sngi la sam ruh ia ki jingbam ba kynthup ia ki soh sha baroh ki khynnah pule jong kane ka skul.
Kham hashwa jong ka jingialang la ioh ia ka jingkren pdiang na ka liang jong ka skul ba la ai jingkren da u Babu D.S. Dhar, uba la pdiang sngewbha ia ka kynhun jong ki Doctor bad ia ka ophis u DM&HO kaba la kloi ban wan pynlong ia kane ka prokram ha ka skul jong ki.
Kum ban shu pynkynmaw ia kane ka prokram Rashtriya Poshan Maah kaba dei ka prokram jong ka sorkar kmie (Central Government) la pynlong baroh shi bnai lynter ha baroh ki bynta jong ka ri India bad na ka liang ka tnad ka Koit ka khia jong ka West Jaintia Hills District (DM&HO) lyngba ka AYUSH kila pynlong ia ki prokram sha ki shnong bad ki skul bapher bapher bapher jong ka West Jaintia Hills, kynthup ia ki skul bad ki College ha nongbah Jowai, tad haduh ka 30 tarik u Nailur.
