Ki nonghikai kiba don hapoh ka lama jong ka All Meghalaya SSA School Teacher Association (AMSSASTA) ha ka 1 Tarik Risaw 2024, ki la sdang da ka jingiakhih shong kyllaiñ myngngor ba khlem buhpor ha Madan Malki. Kane ka jingiakhih shong kyllaiñ myngngor kaba khlem buhpor kaba la pynlong da ka AMSSATA ka long hadien ba ka Sorkar kam shym la shim rai eiei halor ka jingdawa ka Association ban pynkiew tulop 100% ia ki nonghikai SSA.
Haba kren sha ki ladbpathai khubor, na ka liang u Bah Wanpynrap D Lapang, General Secretary ka AMSSATA, u la iathuh ba ia kane la rai ban pynlong da ka jingiakhih ka long hadien ka jingiakynduh bad u Myntri ka tnad pule puthi ka Sorkar Jylla u Rakkam A Sangma .”Halor kane ka jingdawa ka Association ka la ju phah da ki Shithi hynrei haba ngi la leit ban iakynduh ia u Myntri ka tnad pule puthi, u la pyntip ba ka Sorkar kam pat shim rai eiei halor ka jing pynkiew tulop ia ki nonghiakai SSA” u la ong.
U la bynrap, ” ki nonghikai SSA ki la shah pynkiew tulop khatduh kadei naduh u snem 2016 bad mynta la 8 snem kam shym la don shuh kano kano ka jingpynkiew tulop watla na ka liang ka Association ka la ju leit buh da ki jingthoh man ka por sha ka sorkar”.
U Bah Lapang u la ong ruh ba watla na ka liang u Myntri Rangbah u ju ong ba ka tnad pule puthi ka dei ka mat ba hakhmat tam jong ka sorkar MDA hynrei bunsien ki ong bym don Pisa, bad ki ioh pat ban pynlut ha ki tamasa bapher bapher, kane kam iahap . Da kaba kdew ba naduh 2016 la dep ban pynkiew ia ka tulop hynrei hapdeng kane ka 8 snem, ka jingkiew ki mar ki Matta ka la buh jingeh ia ki nonghikai ban pyniaid ia ka ïing ka sem.
Kumta ka rai jong ka Association ka long ba katba ka sorkar kam pat shim rai halor ki jingdawa, kata ban ai da ka jingthoh ba shai, na ka liang ki nonghikai SSA kin shong beit ha madan Malki .
U la bynrap “Ngi la ju phah da ka jingthoh na kawei ka por sha kawei ka por hynrei ka Sorkar kam sngap bad ka pynbor ia ngi ban hap ban ieh ia la ka kam hikai bad ban mih sha madan ban pynsngew ia ka jingdawa”.
Halor ka jingkam jong ka MSSASA, u la ong “hadien ka jingmih ka khubor ba ka Sorkar ka la pdiang ia ka jingpynskem kam ia ki nonghikai SSA, ngi la leit ban iakynduh ia u State Project director u Swapnil Tambe bad u Commissioner Secretary ka tnad u Vijay Kumar Myntri, ban pynthikna ia kane ka khubor hynrei na ka liang jong ki, ki la kyntait ia kane ka khubor da ka ba kdew ba ka Sorkar kan ym lah ban pynskhem Kam ia ki nonghikai SSA”.
U la bynrap ” Kum ka association hi kam kwah ba ka Sorkar kan pynskhem Kam ia ki nonghikai SSA hynrei ka kwah ban pyniasoh ia ki nonghikai SSA sha ka tnad pule puthi jong ka sorkar Jylla, namar lada ki pynskhem Kam ki nonghikai SSA kin hap ban bud shibun ki kyndon, bad kane hi ka jingdawa ban pynkynriah ia ki nonghikai SSA sha ka tnad pule puthi ka Sorkar Jylla ka long hadien ba ka Jylla Assam bad Sikkim kala dep ban pynkynriah ia ki nonghikai SSA sha ka tnad pule puthi jong ka Sorkar Jylla katkum ka bynta” .