Ki nongialam shnong ka Brishyrnot kaba don ha East Jaintia Hills, ki la pynpaw ban ai ka jingkyrshan kaba pura ia ka Public Hearing kaban long ha ka 8 Tarik Risaw 2024, halor ka jingthmu ka Company Star Cement Ltd. ban tih ia u Mawshun na ka jaka ba don ha Brichyrnot ha ka Elaka Narpuh .
Kane ka jingpynsngew na ka liang ki nongialam shnong ka la wan hadien ba na ka liang ka kynhun jong ka Elaka Narpuh Youth (ENY) for Change, haka 28 Tarik Nailur 2028, ka la pynmih ia ka kyrwoh ha ki lad pathai khubor ban khot ia baroh ki nongshong shong ka Elaka Narpuh ban pyrshah jur ia ka Public Hearing ka ban pynlong da ka Meghalaya State Pollution Control Board (MSPCB) ha ka 8 Tarik u Risaw halor ka jingthmu ka Star Cement Ltd ban tih ia u Mawshun na ka jaka kaba 65 hecter ha Brishyrnot.
Haba kren sha ki lad pathai khubor, ha ka 3 Tarik Risaw 2024, u Rangbah Shnong ka Brishyrnot, u Bah Stanly Massar u la iathuh na ka liang ka Shnong kam pat ju iohsngew ne ithuh ruh ia ka kynhun “Elaka Narpuh Youth for Change, bad ka shnong kam don jingtip halor ka jingthmu ba sha lyndet kane ka kynhun ban pyrshah ia kane ka Public hearing hynrei kum ka shnong hi kaba don 60 longïing ka kyrshan pura ia ka Public Hearing ka ban long ha ka 8 Tarik Risaw.
U Bah Massar u la iathuh ba ka jingkyrshan jong ka shnong ia ka jingthmu ka Star Cement Ltd. ban tih ia u Mawshun na ka jaka kaba don ha kane ka shnong ka long namar ba haduh mynta kane ka Company kala bud pyrkhing ia ki kyndon ka Sorkar bad kumjuh ia ki soskular ki ba la dep ban iateh bad ka shnong kaba wanrah shibun ki jingmyntoi ia ka dong ka thaiñ.
“Kane ka Company haba ka la wan ban seng nyngkong, hangne, ka Shnong hi ka la soi da ka soskular ban pynbiang ia ki jingdonkam jong ki nongshong shong kum ki jingai jingpule ei ia ki khynnah kane ka shnong, ban pynbiang ia ki school bus, ban ai kam ai jam ia ki samla kane ka shnong bad kiwei kiwei, nalor ki kam pynroi ha kane ka dong ka thaiñ, la iateh soskular ruh ba hadien ba kane ka Company ka la dep ban tih ia u Mawshun na kane ka jaka kadei ban pynbha biang ia kane ka jaka khnang ba ki nongshong shnong kim lah ban pyndonkam biang ia kane ka jaka” u la ong.
Halor ka jingpynbna ‘Eco sensitive’ ka sorkar pdeng ia ki jaka ba Marjan bad ka Narpuh Wildlife sanctuary, u la ong ba kane ka jingpynban ‘Eco sensitive Zone’ ia kine ki thaiñ ka ktah jur ia ki nongshong shnong kiba kwah ban sengkam lade namar kim ioh shuh ban trei laitluid, da kaba bynrap ba tang ban shna ia ki pungdohkha ruh kim ioh jingbit shuh na ka Sorkar, kumta ka ym tang ka shong Brishyrnot hynrei ka Narpuh Elaka hi baroh kawei ka pyrshah ia kane.
“Na ka liang ki shnong kiba hap hapoh ka Elaka Narpuh, ki la dep ban phah da ka jingujor sha u Myntri Rangbah bad kumjuh sha ka tnad Forest, halor kane ka mat bad kin dang ap ia ka jubab na ka Sorkar” u la bynrap .
U la kdew ruh ba ka jaka ba ka star cement ka thmu ban tih mawshun ka jngai kumba 2km na ka eco sensitive Zone kumta kam don jingthud eiei.
Haba kylli halor ka jingkynnoh ba kane ka lah ban ktah ia ka Wah Lunar, u Bah Massar u la ong ba, kane kam don ka jingshisha namar ki ba bun ki tih mawshun hakane ka thaiñ hynrei haduh mynta ym pat iohi ba ka wah Lunar ka shah ktah na kane ka jingtih Mawshun, da ka ba kdew ruh ba ka jingtih Mawshun da kane ka Company kan long katkum ki kyndon jong ka tnad Mining ka Sorkar, bad kum ka shnong lada ka iohi ba don kano kano ka jingshah ktah ha ka meimariang kan shim khia ban ujor halor kane.
U la iathuh ruh na ka liang ka shnong kam kwah ban pyrshah ia ka jingthmu ka Star cement ban tih dewiong, namar ka shnong ka la dep ban soi da ka jingiateh ba lada kane ka jingtih mawshun kan ktah ia ka mariang ka Company kadei ban siew ia ka compensation, bad ka jingkitkhlieh kan dei ruh ia ka Sorkar kaba ai jingbit ban tih mawshun sha kane ka company.