Ka West Jaiñtia District Sports Association (WJDSA) Jowai mynta ka sngi 4 tarik u Risaw kala sdang ïa ka lympung ïalehkai kaba la tip kum ka 12th Chatister Kharkongor Memorial Trophy jong ka kyrdan 1st Division Football Tournament 2024, ha madan Kiang Nangbah Stadium, Jowai.
Haba phai sha ka jingïakhun ba nyngkong jong kane ka lympung kaba la long hapdeng ka Chutwakhu pyrshah ïaka Khimusniang haka por 2 shiteng nohphai sngi, ka kynhun ïalehkai jong ka Khimusniang kala lah ban pynliem da 3-1 kol ïa ka Chutwakhu, ïa ki kol na ka Khimusniang la thep da u Deepson Tokbi haka minit ba 42, u Sooki Lamare haka minit ba 51 bad u Sanjini Dkhar haka minit ba 90+2.
Katba na ka liang ka Chutwakhu kala pyrshang ban pynphai ïa kitei ki kol hynrei dei ha ka minit ba 76 kala ïoh ban thep tang kawei ka kol lyngba u Bathiang Surong.
La pyntip ba ka jingïakhun lashai ka sngi 5 tarik u Risaw kan long hapdeng ka Dulong FC pyrshah ïa ka Sohmynting SC ha ka por 12 baje mynsngi, katba ka Nangbah Iawmusiang SC kan ïakhun pyrshah ïa ka Sabahmuswang SC ha ka por 2 baje shiteng nohphai sngi.