Ki saw tylli ki seng kiba kynthup ia ka Hynñiewtrep National Youth Front (HNYF), Hynñiewtrep Achick National Movement (HANM), Ri Jaiñtia Youth Federation (RJYF) bad ka Hynñiewtrep National Youth Movement (HNYM), mynta ka sngi thodieng, kila ai ia ka shithi sha u Member Secretary ka Meghalaya State Pollution Control Board (MSPCP) lyngba u DC ka East Jaiñtia Hills District na ka bynta ban pyrshah ia ka jingthmu ban tei thymmai sa kawei ka karkhana pynmih dewbilat ne ka Cement Factory ha shnong Wahiajer, East Jaiñtia Hills kaba tip kum ka Meghatop Cement Pvt. Ltd.
Kum shi bynta ban pan bor na ka bynta ban sdang ia kane ka karkhana ba thymmai, na ka liang ka Pollution Board kan pynlong ia ka Public Hearing ha ka 18 tarik mynta u bnai, ha kaba kine ki saw kila pyrshah ban pynlong ia kane ka Public Hearing.
La iathuh ba ki daw ka jingpyrshah ka dei ba la don lypa haduh 10 tylli ki Cement Factory hapoh ka Elaka Narpuh kiba la ktah ia ka lyer, ki um ki wah, ki khlaw ki btab kumjuh ia ki mrad ki mreng, nalor ba la dep an shah ktah ka wah Lunar bad wah Lukha bad ha kane ka thaiñ don ruh ka Narpuh Reserve Forest bad ka Narpuh Wildlife Sanctuary.
La ong ruh ba kine ki karkhana pynmih dewbilat kim shym lah ban wan rah ka jingkylla ha ka imlang sahlang kamjuh ruh kim lah ban ai kam ai jam ia ki samla ne ban pyndap ia ki jingdonkam jong ki nongshong shnong ka thaiñ, ha kaba kine ki factory ki la ioh lad ban leh katba mon.
Shuh shuh la kdew ruh ba ka dor jong ka dewbilat ka la long kaba rem bha hapoh ka District kaba poi Rs. 450 shi byrni kaba ym iahap satia namar ka dewbilat la pynmih napoh kane ka District hi.
Kumta kine ki saw seng kila kyntu ia ka sorkar ban pynshitom ia kine ki karkhana lada kim lah ban ai kam ai jam haduh 100% ia ki khun samla bad lada kim pynhiar dor ia ka dewbilat.