Ka sngi burom jong ka St. Theresa, ka Nongiada jong ka Parish Jowai bad kum juh ka Diocese Jowai, kaba dei ban long ha ka 1st October, namar ba ka hap ha ka sngi pohia la rakhe pat mynta ka sngi 6th Oct. 2024 kaba dei ka sngi U Trai (Sunday) ha kaba da ki spah ngut ki nongwan ’riewblei na ki 18 tylli ki Parish ka Jowai Diocese ki la iatuid sha ka Shrine jong ka St. Theresa kaba don ha Jowai ban pan jingiasaid bad jingiada na kane ka riewkhuid (St.Theresa) na ka bynta ki jingthmu bapher bapher, ka kam ialap ia ka Khubor babha bad ban nangbha ki longïing longsem jong ki kat kum ka saiñdur jong U Blei.
Ha ka por 10.00 AM la don ka jingkñia Mas Iukharist bakhuid kaba la lamkhmat da u Rt.Rev.Ferdinad Dkhar dd, Bishop ka Jowai Diocese, ha ka jingsynran jong u Rev, Fr. Cresence Laloo, Chancellor ka Diocese, Rev. Fr. Martin Shylla Vicar General ka Jowai Diocese ha ryngkat ki Lyngdohsohblei (Fr.na ki Parish jong ka Diocese) kiba la wan synran iala ka kynhun riewngeit na ki Parish jong ki.
U Rt. Rev. Ferdinand Dkhar uba long u Kongsan ha ka jingkren sneng kren kraw, jingkyntu jingkynpham jong u ia ki Paidriewngeit, u la kyntu bad kwah ia baroh ki longïing ki longsem ban don ka jingiaieid markylliang hapdeng u kpa, ka kmie bad ki khun, kiba duwai bad ki Nongpynphriang ia ka Khubor babha kumba la ai nongmuna da ka Theresa bakhuid, ka riewkhuid Nongpynphriang ia ka jingieid (Science of love) ia ka Khubor babha ha satlak ka pyrthei khamtam ha ki Ri Mishon. Nangta u Bishop u ong ka jingthmu jong ka Balang ha une u bnai October ka long ba ka Balang ka donkam ia baroh ki longïing longsem kiba duwai hala ïing hala sem naba ka ïing ka sem kaba duwai lang, ka imlang ka sahlang. Shuh shuh u Bishop u ong ba une u bnai October u dei ruh u bnai jong ka Maria Theissotti, ka kmie jong U Blei (Jisu) bad la kyntu ia baroh bad ia ki longïing, ki longsem ban duwai ia u Rossari bakhuid man la ka sngi ha la ïing ha la sem bad kum ka kynhun Balang ban dup ioh ia ki jingaiei jong U Blei lyngba ka jingiasaid jong ka Maria ka kmie jong U Jisu.
U Bishop Ferdinand Dkhar haba kren shaphang ka jingkynrei ka jingiaphet lok bad ka jingiapyllait tnga ha kane ka juk mynta ha kano kano ka kynhun Niam, ka daw ka long ba u Tnga bad ka Tnga, ki duna ka jingiaieid markylliang bad kim shym long kiba tieng burom ia U Blei lane phaidien sha ka jingsmai ne jingkular jong ki ha ka sngi kaba ki kyntiew kurim. Nangta u Bishop u nangpynskhem shuh ia kane ka jing ong da kaba shim na ka jingthoh bakhuid (Io.13:34) kaba ong to ia ieid markylliang kumba nga la ieid ia phi bad na ka shithi jong u Paul Apostol (Ephasus 5:21-31) kaba kren shaphang ka jingiaburom bad ka jingiaieid shitnga.
Ka ïing ka sem jong ka Theresa bakhuid ka long ka ïing ka sem kaba duwai bad ka kylla long ka Nongialap ia ka Khubor babha, to ngin ia pyrthuhbud ia ka nuksa jong ka Theresa bakhuid bad ia ka ïing ka sem jong U Jisu, ka Maria bad u Joseph bakhuid, u Bishop u la pynkut ia ka jingkren sneng kren kraw da ka thong jong ka Family Commission kaba ong “We would like to have the happy family, Holy family and health family”.