Ka public hearing jong ka company Star Cement Lumshnong ba la pynlong mynta ka sngi ka 7 tarik u Risaw 2024 ha shnong Lumshnong, East Jaintia Hills District, ka la long kaba iaid beit haduh kaba kut ha kaba baroh kiba ai jingkren ha rynsan ki la ai ka jingkyrshan ia ka company kaba don ka jingthmu ban khlong ia u mawshun na kawei ka par kaba don ha Lumshnong, ka Daba Saitthad Limestone Deposit kaba don ka jingheh kaba 25 hectare ha Wahlareng.
Katei ka par mawshun Daba Saitthad Limestone Deposit ha Wahlareng Lumshnong, ka dei ka jaka jong ka Balang Presbyterian Lumshnong.
Ha kane ka public hearing, ki la don khatsaw ngut kiba la ai jingkren ha rynsan bad u Santosh Pant, uba dei u Consultant u la ai ki jingbatai ba bniah ha kaba iadei bad ka project ban khlong ia u mawshun na katei ka par Daba Saitthad kaba don ha Wahlareng ha shnong Lumshnong.
Kumjuh ruh u Waheh Shong Lumshnong, u bah Monlang Ladong, u la ong ba kumba la dep ban iateh kular bad ka Environment u kyrpad bad kyntu ia ka company Star Cement ba ka dei ruh ban da peit bha ba ym dei ban leh klumar ne leh thurmur haba pyntrei ha kane ka par maw shun hynrei dei ban da leh bha ha kata ka rukom ba ka jingkhlong mawshun kan nym ktah ia ka mariang, u la ai ruh ka jingkitbok kitrwiang ba ki kam kin iaid beit ha kane ka par mawshun ha Dabasaitthad ha Lumshnong.
La plie ia kane ka Public Hearing da u ADC East Jaintia Hills District, u bah G. Warjri bad la pyniaid pat da u Environmental Engineer ka tnat Meghalaya Pollution Control Board, u bah Y.F. Laloo.
Kiba la ai jingkren ki kynthup ruh u Secretary Shnong Lumshnong, u bah Embhahlang Lamare, U waheh shnong barim jong ka Umstain, u bah Victor Suchiang, u bah Damekit Pynkhlong bad kiwei kiwei.
