Ki nongialam jong ka HNYF Southern Border Area mynta ka sngi ki la wan iakynduh ia u MLA jong ka Mawsynram u Bah Olan Sing Suin halor Ka jinglaitlan bad ka jingrung beaiñ ki nong Bangladesh sha ka Ri India lyngba ki khappud border, ha ka ba la jan man ka sngi khlem ki nongiada na ki BSF ki ba dei ki shipai iada khappud, ka ba la pynlong ia ki khar Bangladesh ban rung tuh na khappud ban wan shong wan sah ha ka jylla.
Na ka liang ka Hynniewtrep National Youth Front (HNYF) Southern Border Area halor kane, ka la pynpaw ka jingsngewkhia, ba ki BSF kidei ban peitngor bha hangtei ha border ban iada ia ka jingrung kyrthlep ki khar Bangladesh, hynrei ki BSF ki long pynban ki nongbat ia ki marbam ha Ladbakli ka lad ban leit sha Balat bad sha Ranikor jong ki paidbah ki ba thmu pynpoi ha ki border.
Ha ba iakren bad ki lad pathai khubor mynta ka sngi ka 8 tarik Risaw 2024 u bah Kyllang Thongni President ka HNYF Southern Border Area u la ong, ba ki BSF ki la kem naphang ia ki marbam jong ki paidbah ki ba thmu leit rah sha ki iew border Balat, Dangar, Nongjri.
U la ong ruh, ba ka kam jong ki BSF kadei ban ap pahara ha ki khappud ban iada ia ka jingwanrung kyrthep ki khar Bangladesh hynrei kine ki BSF ki ap pahara pynban sha Ladbakli ka ba dei ka lad ban leit sha Ranikor sha Balat ban bat bad kem ia ki marbam ki paidbah ha thmu leit rah sha ki iew border.
“Lada ki BSF ki kem ia ki mar ki ba long beaiñ kum ki Drok, ki Kynja bad kiwei kiwei de kata kum ka seng ka ai ka jingkyrshan ba pura, hynrei ka seng ka la pynpaw ka jingsngewkhia ba balei ki BSF ki kem pynban ia ki marbam bad ym tang katta ki BSF ki la daiñ kuna ruh na ki kali ba kit ia ki marbam”, la bynrap u bah Kyllang.
Shuh shuh ka seng ka la dawa ba dei ban pyntreikam biang ia ka Infiltration Check Gate ka ba don hapoh shnong Umpung bad ruh ban buh sa kawei ka Infiltration Check Gate hapoh shnong Dangar, ban iada na ka jingrung laitlan ki bar jylla ki bym lah bam ithuh la kidei ki ba na bar Ri ne na ki bar jylla.
Ha ka ba iadei bad kane na ka liang u bah Olan Sing Suin MLA ka Mawsynram u la kular, ban shimkhia ia kane ka kam ha ba iadei bad kine ki kam ha border.