U Myntri Rangbah ka jylla Meghalaya u Conrad K Sangma u la leit jngoh ia ki jaka ba shah ktah ha ka jingtwa khyndew bad ka jingshlei um ha Dalu ha West Garo Hills bad ha Atisia Songmong ha South Garo Hills.
Ha kane ka sngi, u la leit ban jngoh ruh ïa ki ba haïing hasem kiba la ïap ha ka jingtwa khyndew ha ki shnong bapher bapher kiba hap hapoh ka Dalu C&RD block ha West Garo Hills.
U Myntri Rangbah u la aiti ia ka pisa (ex-gratia) kaba T.4 lak marwei na ka bynta ki briew kiba la iap ha ki jingtwa khyndew, kata sha kiba ha iing ha sem.
U la pynpaw ruh ka jingsngewsih bad jingdiaw halor katei ka jingjia kaba la wanrah ïa ka jingsngewsih jong ki paidbah ha kum kine ki jingjia.
Ha Rongkhon Songgital ha Tura, u myntri rangbah ka jylla u la aiti ia ka ex-gratia sha ka kurim jong u (L) Bijoy Marak, u nonghikai da ka kam ha kaba ka kali jong u ka la shah rong noh ha ka um kaba la shlei um kaba la shim ia ka jingim jong u bad u khun jong u Wian Chigado R Marak ha ka 10 Tarik Risaw 2024 , bad la aiti ia ka pisa ex-gratia kaba T.8 lak sha ka tnga jong u (L) Marak.
Ha ka shnong Karonggre, Dalu, u myntri rangbah u la iakynduh ia kiba ha ïing ha sem bad aiti ia ka ex-gratia kaba ₹4 Lak sha ka ïing jong ka Sanira Marak kaba dang 18 snem ka rta kaba la khlad namar ka jingtwa khyndew.
Ha ka shnong Sorokpara ha Dalu, u la leit jngoh ïa ki kmie ki kpa kiba sngewsih jong u Miando P Marak, u khynnah shynrang uba dang 5 snem ka rta uba la khlad noh ha ka jingtwa khyndew katba u dang ïalehkai shadien jong ka ïing jong ki ha ka 4 tarik Mynta u bnai.
U myntri rangbah ka jylla u la pynpaw ia ka jingnoh mynsiem kaba khraw haba ia kynduh ia ki kmie ki kpa kiba la sngewsih namar ka jingduh noh ia la u khun.
Katba ha Tibapara hapoh Dalu, u myntri rangbah ka jylla u la leit ban jngoh ia ka ïing ka sem jong u Tengseng R Marak uba la khlad noh da kaba sngewsih na ka daw ba u dieng u la hap halor ka kali jong u ha Songsak.
U la leit ban jngoh ruh ïa ka longïing jong u Santa Marak uba la shah tep im ha ka jingtwa khyndew ha ka shnong Koinabhui kaba don ha Dalu. Ka la iehnoh shadien ia ka khun jong ka kaba la mynsaw ruh na katei ka jingjia.
Kiba bun ki longïing ki la shah ktah namar ka jingtwa khyndew ha katei ka thaiñ. U la shim ia ka jingkheiñ ia ka jaka ba ioh ia ki jingjulor bad u la iakynduh bad ki nongshong shnong kiba shah ktah.
U la pynlong ïa ka jingbishar bniah bad ki bor pynïaid District jong ka West Garo Hills ban bishar bniah ïa ki jingjulor na ki jingshlei um bad jingtwa khyndew ha Dalu C&RD Block bad ban buddien ïa ki kam ai jingïarap ba la leh haduh mynta.
Ha Dalu C&RD Block, ki bor mariang ki la pynjulor haduh 2630 tylli ki longïing bad shim ïa 6 ngut ki mynsiem briew. Ki bor pynïaid District ki la thaw haduh 68 tylli ki Relief Camp bad ki la ai ka bam ka dih ïa ki lanot kiba la shah ktah ha ka jingshlei um bad jingtwa khyndew.
Ha ka jingbishar bniah, u myntri rangbah u la bthah ia ki heh sorkar ban pynlong ia ka jingpule bniah ia ki wah bad ki jaka um bad ka jaka ba lah ban shah shlei um na ka bynta ban pynduna ia ka jingshlei um bad ban shim ia ki lad jingiada na ka jingshlei um khnang ban lait na kum kine ki jingpynjot ia ka jingim bad ki mar ki mata ha ki por ban wan.
La bthah ruh ban maramot mardor ïa ki surok bad ki jingkieng kiba don ha ka Block bad ban pynthikna ban pynbiang ïa ki tiar ba donkam sha ki paidbah kiba shah ktah.
U la iakynduh ruh ia ki koidi jong ka relief camp ha Dalu bad u la iohsngew ia ki jingeh jong ki.