Ka jingiakhun na ka bynta ka lympung Meghalaya Youth League ka la poi sha ka semi final hynne ka sngi ha kaba ka West Jaiñtia U-14 lane ki khynnah kiba hapoh 14 snem ki la ioh ia ka kabu ban jam sha ka Final jong kane ka lympung lyngba ka jinglah ban pynliem lyngba ka penalty da 4-3 pyrshah ia ka SSA ha madan SAI, NEHU Shillong.
Ha kawei pat ka jingiakhun ba la pynlong ha madan MFA ka Nongstoin ka la lah ban pynliem ia ka Ri Bhoi da 1-0 lyngba ka kol jong u Rafel Markwis Wanniang ha ka minit ba 45.
Haba phai pat sha ka jingiakhun ki khynnah 16 snem, ka SSA ka la pynliem ia ka West Jaintia da 4-1 kol. Ia kitei ki 4 kol la ioh ban thep da u Menangpyndap Khongjee 2 kol, kata ha ka minit ba 51 bad 90+5, ia kawei pat ka kol la ioh ban thep da u Wanpyndap Kharkongor ha ka minit ba 77 katba ia ka shi kol na ka bynta ka West Jaintia la ioh ban thep da u Serene Dkhar ha ka minit ba 90+1.
Bad ha ka jingiakhun ba khatduh, ka Ri Bhoi, ka la lah ban pynliem noh ia ka Nongstoiñ da 3-2 kol. Na kitei ki 3 kol u Me U Ba-ai Sumer u la ioh ban thep 2 kol ha ka minit ba 9 bad 58 bad ia kawei pat ka kol la ioh da u Prosperwell Ryngtong ha ka minit ba 27. Bad ia ki ar kol na ka bynta ka nongstoiñ la ioh ban thep da u Mickystar lyngdoh ha ka minit ba 23, bad u Shemborlang Snaitang ha ka minit ba 85. Baroh ki kynhun ki ba la ioh jingjop ha kane ka sngi kin sa ap ia kiwei pat ki kynhun na ka bynta ban ia knieh ia ka nam lahduh, kata hadien ka semi final ba ar.
