Ka ophis treikam jong Ka Hans Foundation kaba don ha Phramer West Jaiñtia Hills District ha ryngkat ka jingïatreilang bad ka District Legal Services Authority WJHD, mynta ka sngi Palei kila rakhe ïa ‘World Mental Health Day’ haka jingïalang bala pynlong ha ïew Thadmuthlong-C Phramer, halor ka phang kaba ong “It is time to Prioritise Mental Health in the Workshop”.
Ïa ka jingïalang la pynïaid da u samla Savio Phawa, la ïoh ruh ka jingbatai da u Hilarius Shylla, Project Manager ka THF uba la pynsngew shaphang ka “The Hans Foundation” (THF) ka dei ka seng treimon sngewbha kaba lah register ha u snem 2009, ki kam ba kila leh ki long ban ai jingïarap haka liang jong ka koit ka khiah, ka pule ka puthi, ïa kiba don jingduna ha ki dkhot met bad ka jinghikai pyntbit ban ïeng hala ki jong ki kjat ban kamai jakpoh.
Shuh shuh ka THF ka pyntreikam hi dalade lane da kaba ïa synrop lang bad kiwei ki kynhun kiba trei ki kam pynroi ka jingthmu jong ki prokram baroh ka long ban kyntiew ïa ka jinglong jingman jong ki briew kiba duna ka ïoh ka kot kiba shong basah ha ki sor, ki khappud bad ha ki nongkyndong jong ka Ri India.
Haduh mynta ka THF ka lah ai jingkyrshan ïa kumba 300 tylli ki kynhun kiba trei ki kam pynroi ha ki 26 tylli ki jylla ka Ri.
La batai ruh shaphang kane ka projek jong ka “The Hans Foundation” (THF) kaba pyndonkam da ki kynhun kiba trei ki kam pynroi kiba lah ju trei haka jylla kum ka Bethany Society kaba la sdnag naduh ka snem 1981, ban pynkhlaiñ ïa ki tnat treikam ha ka koit ka khiah jong ki briew kiba don ïa ki jingshitom haka jingmut jingpyrkhat (person with Mental Illness) ki jingpang khering (Epilepsy) bad kiwei de.
Ula ong kane ka projek ka kyntiew ïa ka jingtip shaphang ka koit ka khiah kaba bha ha ka jingmut jingpyrkhat jong baroh, ka pynbiang jingsumar bad ai dawai ïa kiba don ki jingshitom, ka ai ruh ka jinghikai pyntbit ban ïeng hala ki jong ki kjat ban kamai jakpoh bad kane ka projek ka treikam ha ki 40-60 tylli ki shnong jong ka West Jaiñtia Hills District.
Ha kane ka sngi ki nongtrei ka Hans Foundation WJHD kila ïashim bynta ban ai ki jingshad bad ki jingïalehkai ‘Street Play’ ban pynsngewthuh sha ki paidbah halor ka jingktah jong ka jingpang jingmut jingpyrkhat bad kumno ban ïoh ki lad jingïada lyngba ki jingïasyllok bad ki dawai. Katba ïa ki kyntien ai khublei la ïoh na u ma Henry Shylla.
