Ka Sarot I Man ka kynhun jong ki 11 ngut ki shiparalok kiba don ka jingthmu ban treimon sngewbha ia ka imlang ka sahlang mynta ka sngi (27/12/2021) ka la ioh lad ban leit ai jingiarap sha ki khunswet kiba don ha NEIMA ha shnong Sahsniang.
Ha shwa ban sam ia ki jingiarap kala don ka jingialang kaba lyngkot ha kaba la ioh ia ka jingpdiang burom ia ki dkhot jong ka seng da u Pastor Rev. B.D. Shangdiar uba la pynpaw ruh ia ka mynsiem kaba kmen halor ka jinglah jong ka seng ban ithuh ia kane ka jaka ri khunswet.
Ia ka jingialang la pyniaid da u ma Phrang Sngi Challam. La ioh ruh ka jingnguh Blei na u ma Sienmitre Sumer. La ioh ruh ka jingkren na u ma Shape Pasweth uba la iathuh lyngkot ia ka jingsdang bad ka jingiaid lynti jong ka Sarot I Man, u la ai ka jingsneng jingkyntu ruh ia kine ki khynnah bad ia ki nongpeit nongpyniaid jong kane ka jaka ba ki dei ban long kiba nang ban kheinkor bha ia ka por, namar ka por ka long kaba kordor haduh katta katta ha ka jingim u briew. Ula kyntu ruh ia kine ki khynnah ba ki dei ban iabud ia ka jingnang jingstad. “Phi dei ruh ban burom ia ki nongpyniaid jong ka NEIMA namar ba kila long kum ki kmie ki kpa jong phi hi” la ong shuh shuh u ma Shape.
Na ka liang jong u ma Wombai Sumer uba la ai ki kyntien ai khublei.
Ha kane ka sngi ka Sarot I Man kala ioh ban sam da ki sopti bad ki jingbam sha ki 19 ngut ki khynnah ba don ha kane ka jaka ri ia ki.
Na ka liang ki nongpyniaid jong ka NEIMA la ai jingkren da u ma W.T. Talang uba dei u Vice Chairman ba mynta bad u ban sa shim ia ka kam Chairman ha u snem ban wan (2022). U ma Talang ula pynpaw ka jingsngewnguh kaba khraw ia ka Sarot I Man, namar ha ka por bym poi pyrkhat bad ha ka por ba donkam eh kane ka kynhun kala wan ban pynioh ia kine ki jingiarap sha kine ki khynnah jong ka NEIMA. U ma Talang ula ai ki kyntien kyrkhu kyrdoh ia kane ka kynhun ba u Blei un don lang ryngkat bad ki dkhot jong ka baroh, kiba don shisha ia ka jingiohi jngai ban iarap ia ki para briew.
Shwa ban pynkut ia ka jingialang la don biang ka jingduwai na u Pastro B. Shangdiar.
