Ka Seng Hynniewtrep Integrated Territorial Organization (HITO) Narpuh Circle, haka 9 tarik Risaw, 2024 ka la phah da ka jingthoh sha ka Meghalaya State Pollution Control Board (MSPCB) lyngba u Deputy Commissioner jong ka East Jaintia Hills District u Shivansh Awasthi, ban pynpaw iaka jingpyrshah kaba jur halor ka jingthmu jong ka Meghatop Cement Pvt Limited ban pynlong ia ka Public Hearing haka tarik 18 Risaw 2024 naka bynta ban tei ia ka karkhana pynmih dewbilat (Integrated Cement Plant of capacity 3.3 MTPA Clinker, 2.8 MTPA Cement bad 16 MW Waste Heat Recovery System) ha shnong Wahiajer Narpuh, East Jaintia Hills District.
Lyngba ka jingthoh ba la soi da President bad General Secretary ka Narpuh Circle ki la pynpaw ia ki nongrim ba ka Seng ka pyrshah dei namar ba ka jingtuid u bar jylla ha East Jaintia ka long kaba lah i shyrkhei bad kan don jingma ruh hadien habud, ka ban sa ktah ia ka kamai kajih jong ki pateng ki ban sa wan, lada u mynder u ioh kdup lut ia ka khaiï ka pateng jong kiba mynta, ym slem shuh ka synshar khadar shnong kan jot kan pra.
Ka seng ka la kdew ruh ba ki kharkhana pynmih dewbilat kiba active mynta ki don haduh 8 tylli hapoh East Jaintia District, tang ia kine kiba lah don lypa ruh la iohi shai ba ki ladep ban pynjot bad pynjakhlia ia ka mei mariang bad nalor kata ka jingkyrduh kam ka dang kiew na kawei ka por sha kawei pat. Te kan myntoi aiu ban wanrah shuh shuh ne kham pynbun ia ki kharkhana pynmih dewbilat haba ia ki jingeh la ioh mad da ki laiphew jait laiphew rukom. Ia ka thungkam thungjam ruh dang bun u bar jylla ban ia ki trai jylla, haba bun na ki kam ba ki briew jong ka thaiñ ki lah ban trei hynrei kine ki kharkhana ki wanrah pynban da ki bar jylla kumba ibein ikhoh ia ka hok ka jong ki trai ri.
Katba dang iaid ki sngi ka jingkyrduh umdih umbam ha ki por aiom Tlang ka long kaba shyrkhei namar ym don wah ym don khlaw shuh bad da ki phew jait ki jait jingpang lah nang roi, ka jingshit ruh ka dang iai kiew ha man la ki snem. Kumta, naka liang jong ka seng ka pyrshah jur ia kane ka Public Hearing jong ka Meghatop Cement Pvt Limited. Ka Seng ka la maham ruh ia ka sorkar ba ym dei shuh ban ai jingbit ia kino kino kiba thmu ban tei karkhana pynmih dewbilat hapoh East Jaintia bad ka sorkar ka dei ban pynsangeh noh ia ka ne ka Public Hearing.
U Vice President jong ka HITO Narpuh Circle, u la bynrap shuh shuh “Ba ngi tip ba don ki katto katne kiba kyrshan bad don ruh kiba pyrshah, hynrei ka jingpyrshah ka jong ngi (HITO) kam dei ba ngi shun ia ka ja kpoh jongno re jongno, ka jingpyrshah jong ngi hi kadei beit katkum ki mat bala thoh haneng. Ki shnong kiba don ki cement factory ki la dap sa tang ki pum pum hapoh shnong hapoh thaw hapoh ïing hapoh sem te kan bha ba ka sorkar kan wanrah da ka Training Centre ha East Jaintia haka jaka kine ki kharkhana pynmih dewbilat. Ha kane ka training centre dei ban don ka Electrical, Mechanical, Automobile bad ki Computer Courses khnang ba ki samla kin ioh pyntbit ialade ha kaba kin apply kam ruh ha kine ki Cement Factory. Kum ka jingai jingmut ruh ia ka sorkar, ia kane ka Training Centre dei ban tei bad siew hi ia ka jinglut jingsep da kine Cement Factory kiba la don lypa ha East Jaintia Hills District.