Kawei ka jingujor kaba la ujor da u ma D. W. Laloo uba long ruh u President rangbah ka Meghalaya People United Front (MPUF), pyrshah ia ar ngut ki briew kiba kynthup ia u ma S. Dhar bad ka kong B. Dkhar, kiba la pynpaw ha ka comment section jong kawei ka lad pathai khubor kaba la mih ha kawei ka channel social media ha ka jingiadei bad ka khubor jong ka jingpynkhalai ia ki Ticket lucky Draw jong ka Chiyung Multipurpose Society ha kine ki sngi kiba la dep.
Ha ka jingiadei bad kane ka kam na ka liang ki nongshah ujor kumjuh ruh u nongujor kila wan mih ha Jowai Police Jowai ha khmat u OC ka PS Jowai mynta ka sngi Thodieng. Hadien ka jingiakren kila poi sha ka jingsngewthuh bad kila rai ban iasuk bad la pynkut noh ia kane ka jingujor.
Na ka liang u ma S. Dhar la ong ba kumba u juh comment ha Facebook na ka por sha ka por bad na ka bynta kato ka jing comment ha kato ka khubor jong ka Chiïung um mut bad wanrah ka jingktah ia kiwei.
Na ka liang ka kong B. Dkhar ka la ong ba ka comment jong ka kam shym la mut ne thew ba kan ktah ia ki jingsngew jong kiwei hynrei ka jingcomment jong ka, ka long beit tang ia kato hi khubor bad kam poi pyrkhat ruh ba kan ktah ia kiwei.
Katba na ka liang u President ka MPUF, u la kyntu ia kiwei de haba ki comment ia kino kino ki khubor ne ki jingthoh ha social media, ka dei ban long kaba ym ktah ia ki riew shimet ne ia kano kano ka seng ne kynhun kaba lah ban wanrah ka jingsngew bitar bad jah burom ia ki, lada kwah ban comment ki dei ban comment da kaba lah ban wanrah ia ka jingtei bad jingiatip lem ha ka imlang sahlang ym ban pynklumar ne pynshit paidbah.
Shuh shuh ha ka jingiadei bad ka Lucky Draw jong ka Chiïung Multipurpose Society, u la ong ba ai ba kane ka Lucky Draw jong ki Chiïung kan long biang kaba iaid beit iaid ryntih ha kaba kumno kin leh ha kine ki sngi ban wan kata ka shong ruh ha ka jingstad ka jong ki bad u kitbok kit rwiang ruh ia baroh ki dkhot jong ka Chiyung bad lada kin pynkhalai biang kin leh da kaba pynhun ia ki paidbah khnang ba ki paidbah ruh kin don biang kata ka jingshaniah ia ki kumba ki shaniah bad ieit ia ki baroh shi katta.