Ka lehniam Durga Puja jong ki riewngeit Hindu, kaba ju long manla u snem kaba la shim bynta lang da baroh ki riew ngeit Hindu hapoh ka ri, ha nongbah Jowai ruh kala poi noh sha kaba kut mynta ka sngi 13.10.2024, ha kaba ka jinglehniam ka long kaba iaid beit iaid ryntih ba la iashim bynta da ki nongialam ka Puja Committee, ki riewngeit Hindu kynthup naduh longkmie ki longkpa ki khun samla bad ki hep kiba rit.
U President ka Jowai Durga Puja Committee u S. Chakraborty, u la ong ba mynta u snem kane ka jingleh niam ka kala sdang naduh kine ki khyndiat sngi kiba la dep bad mynta kaba dei ka sngi khatduh, la buh ka jingduwai phirat kaba kynthup na ka bynta ka suk ka sain hapdeng ki jait bynriew ym tang hangne ha jylla hynrei ha ka ri bad baroh hi kawei ka pyrthei lyngba ka jingkyrkhuh kyrdoh kaba wan lyngba kane ka Puja.
Ha kane ka sngi khadduh la leit rah ban pynngam um ia ka blei Durga ha ka jaka ba la shna kyrpang ha ki bynta ka wah Myntdu ha ryngkat ka risa bad ka nguh ka dem blei, hadien ba la dep pynngap um ia ka blei, la teh ia ka da u tyllai khang ba lashai yn sa lah ban leit pynkhuid ia ka, ha ka jingiadei ban pynneh pynsah ia ka jingkhuid jingsuba jong ki um ki wah.
Ha kane ka sngi la wan ban sakhi naduh ki ophisar na ka tnad Pulit bad na ki bor pynïaid District ha ryngkat ki paidriewngeit Hindu na kylleng.
Ia kane ka juh ka lehniam hapoh West Jaiñtia la pynkut kymjuh ha shnong Nartiang kaba dei ka lehniam Durga Puja jong ki Pnar, ha Dawki bad ha Muktapur. Kumjuh ruh ka East Jaintia Hills District la leh ia kane leh niam ha Khliehriat bad ha kiwei de ki jaka.
