Ka Hynñiewtrep Youth Council (HYC), East Jaiñtia Hills District, lyngba u Environment Secretary Kamelus Khaii, ka pynpaw ïa ka jingpyrshah kaba jur ïa ka jingpynsngew paidbah ne ka Public Hearing kaba la buh por da ka Meghalaya State Pollution Control Board (MSPCB) ha ka 18 tarik u Risaw, 2024, ha kaba ïadei bad ka jingthmu ban seng ia ka M/S MeghaTop Cement Pvt. Ltd ha Shnong Wahiajer, EJHD.
Ka jingpyrshah jong ka HYC ka mih naba ka jingbishar ka dang iaid wat hapdeng ki jingpyrshah kiba shai na ki paidbah nongshong shnong ka Wahiajer, ki paidbah ka Elaka Narpuh, bad ka District hi baroh kawei.
Dei ban sngap ia ka sur jong u paidbah bad ym dei ban pyndem da kano kano ka bor, la ka long ha ka shnong, ka Elaka ne ka District. Ki paidbah ki don ka hok ban shah kynthup ha ki rai kiba ktah beit ia ka jingim jong ki bad ymdei ban iehnoh iaki jingeh jong ki. Kumta ka HYC ka kyntu ba dei ban pynsangeh noh ïa katei ka jingpynsngew paidbah, namar ka dei ka jing angnud jong ki trai shnong bad ki paidbah ka Elaka hi baroh kawei.
Shuh shuh, ka seng ka pyrshah ia ka jingbuh ia kane ka karkhana namar, wat la ki don bun ki karkhana ha ka District EJHD, hynrei ka jingbym don kam ka dang long ka mat kaba kongsan. Kine ki kharkhana ki kham sngewtynnad ban wanrah iaki nongtrei bad ki nongtrei nabar jong ka thain, ki ai jingmyntoi tang khyndiat eh iaki nongshong shnong.
Nalor ka jingeh ha ka liang ka ioh ka kot, ka jingktah ia ka mariang jong kine ki kharkhana ka la long kaba jur bha, ha kaba ka jing jaboh ka lyer bad ka jingmih tdem dewbilat ka la wanrah iaki jingeh kiba khraw ha ka koit ka khiah jong ki nongshong shnong. Lada ailad ïa kane ka kharkhana thymmai ba kan ïaid sha khmat, kan shakri tang ban pynmyntoi ïaki briew kiba nabar katba kan nang pynsniew shuh shuh ïa ka mariang bad pynsniew shuh shuh ïa ka koit ka khiah jong ki trai shnong trai muluk bad ka Elaka hi baroh kawei.
Halor kine ki jingsngew khia, ka seng ka kyntu ia ka MSPCB ban weng noh ia ka jingthmu ban bishar paidbah bad ban shim khia ia ka jingktah kaba jrong ha baroh ar ka mariang bad ka jingbha jingmiat jong ki nongshong shnong. Dei ban buh hakhmat eh ia ka sur jong ki paidbah trai shnong bad ka Elaka ban pynthikna ba ka roi ka par kan ym wan ha ka jingduh nong ia ka mariang bad ka koit ka khiah.