Yn ym ïashim bynta ka AKMTTA ha ka jingïalang ka tnad Tourism: Byrngem ban shim da ka sienjam ba tyngeh

 U nongialam  ka All Khasi Meghalaya Tourist Taxi Association (AKMTTA), u Bah Ricaldinius Dohling , u la pyntip ba ka Association kan ym leit ban ïashim bynta ha ka jingialang ban pynlong da ka tnad Tourism jong ka Sorkar Jylla ka ban long ha ka 15 Tarik Risaw 2024, da kaba kdew ruh ba ka Association kan sa shim da ki sienjam ba tyngeh halor ka jingbym patiaw ka sorkar ia ki jingdawa kong ki.

Haba kren sha ki ladpatahi khubor, u Bah Ricaldinius Dohling u la ong ba ka Association ka la ioh ia ka Shithi na ka sorkar halor ka jingpynlong ia ka jingialang ,ha ka 15 Tarik Risaw 2024 , hynrei ha kane ka jingialang la khot lang ia ki nongpyniaid ki Guest house, ki hotel bad kiwei kiwei, kane ka jingkhot lang ka Sorkar  ia kiwei pat ki kynhun ka dei ka bym don nongrim  namar ka jingiakhih ka dei halor ka jingeh ki nongñiah kali tourist.

"Ha ka 19 Nailur 2024, na ka liang u Myntri Rangbah u la bthah ia ka Association ban ai ki jingaijingmut sha ka Sorkar khnang ban lah ban weng ia ki jingeh ki nongñiah kali tourist ha ka Committee bad ngi la rah ruh ia kine ki jingaijingmut hynrei ha ka jingialang  pat ki khot ia baroh ki bym dei ki ba don bynta bad ki nongniah kali" ong u Bah Dohling.

 U la bynrap  "ki trai jong ki hotel, ki Guest house kim dei ki ba mad jingeh hynrei tang ki nongñiah kali tourist hi ki mad jingeh na ka jingbym ioh kamai, kumta ngi kyrpad ba kin khot shwa ia ki nongñiah kali ban pynbeit ia ka jingeh jong ngi".

U Bah Dohling  u la ong shuh shuh "Ngim sngewtynnad ban leit sha kane ka jingialang namar ka long kum ba khleh jaktung, namar ka jingthaw ka Sorkar ia ka Committee ka dei hadien ba mih ka AKMTTA ban pynsngew ia ki jingeh".

 "Na ka liang ka Association lashai ka sngi kan sa khot da ka jingialang ban shim da ki sienjam ki ba tyngeh, namar kumba ka long mynta ka Sorkar hi da bym shim da ki sienjam ba tyngeh kam patiaw, namar mynta la shisnem tam, na ka liang  ka Association ka la kyntu ia ka sorkar ba kan thaw noh da ka policy ban pyrkhing noh ia ki kali ba nabar ban leit shaduh ki jaka jngohkai pyrthei"u la ong biang.