Ka Dorbar Shnong Saphai Pyllun West Jaiñtia Hills District mynta ka sngi kala pyntip paidbah sha baroh ki nongwan shangkai kumjuh ïa kito kiba leit bam khana shapoh ka shnong Saphai khamtam ha ki bynta ka Wah Kupli ba kin long kiba leh khuid.
Ka shnong kala pyntip ba lada don kino kino kiba ïaid lait ïa ki jingmana ha kaba ïadei bad ka khuid ka suba khamtam ïa kito kiba wan bam khana lane ki wan wan leh khlem akor ne buaid tanglang sha ki bynta jong katei ka jaka, lada lap ïa ki ka Dorbar Shnong kan nym map satia bad kan pynshitom ïa ki katkum ki kyndon aiñ kiba tyngeh.
Ha ka juh ka por la maham jur ïa kito kiba wan nabar jong ka shnong ba ynda kila dep ban shangkai ne bam khana sha ki bynta jong katei ka jaka (Wah Kupli) ki dei ban pynkhuid bha ïa ki jaka ba la dep pyndonkam bad kin mitnoh na ka katei ka jaka hapoh ka 5:30 janmiet, kane ka jinghukum jingmana kan treikam noh naduh ba la pynbna ïa kane ka khubor.
