Ka Dimonlang Cultural Social & Sports Club Mawlong mynta ka sngi 15 tarik u Risaw kala pynhap pyrda ïa ka lympung ïalehkai phutbol bala tip kum ka 2nd 7-Aside Football Tournament 2024, bala pynïakhun ha madan phitbol jong ka Shnong Mawlong Amlarem Sub-Division West Jaiñtia Hills District.
Ïa kane ka lympung la wan ban pynhap pyrda da u kongsan Dr. Wanweiroy Kharlukhi uba dei ruh u MP ka Rajya Sabha, ha ka jingdonlang u Ex MLA ka thaiñ ma Stephanson Mukhim, u Waheh Shnong ka Mawlong ma Moonlight Lamat, ki nongkitkam ka Sports Club bad ki riew ieit phutbol ka thaiñ kiba la wan ban sakhi lang ïa kane ka jingïakhun phainal.
Na ka liang u kongsan Dr. W. Kharlukhi haba ai jingkren hashwa ban sdang jong ka jingïakhun ula ai khublei kyrpang ïa ka Dimonlang Cultural Social & Sports Club Mawlong kaba la lah ban pynlong ïa kum kane ka lympung ïalehkai kaba ïarap ban ai mynsiem ïaki rangïalehkai jong ka thaiñ. Ula pynsngew ruh kiba bun na ki rangïalehkai na kane ka thaiñ War Jaiñtia kila paw bha haki lympung bapher bapher hapoh ka jylla bad shabar ruh kumjuh.
Ha ka juh ka por ula kular ban pynïoh ïa ki jingdawa jong ka shnong kiba la dep ban aiti da ka jingthoh ha u mynta ka sngi, da kaba kular ban ïatreilang bad u ma Stephanson Mukhim ban leit ïa kreh sha ki bor ka sorkar jylla lyngba ki myntri ba dei peit ïa ki jingdonkam ha katei ka thaiñ.
Haba phai sha ka jingïakhun phainal mynta ka sngi ka War Jaiñtia Teacher kala jop da 3-2 kol ïa ka Ammutong SC. Ka jingïakhun hapdeng kine ki ar kynhun kala long kaba itynnad bha namar ha ka por jong ka kylla step kila ïakhaid da mar shikol (1-1), ïa ka kol ba nyngkong na War Jaiñtia Teacher la thep da u Embor Lamare ba phong ïa ka Jersey No-14 haka minit ba 19, hynrei ha ka minit ba u 20 ka Ammutong SC kala ïoh ban pynphai ïa kol lyngba u Marshial Nongrum Jersey No-9.
Katba ha ka jingïakhun jong ka kylla miet ka War Jaiñtia Teacher kala ïoh ban thep sa ar kol lyngba u Civil Khongmalai Jersey No-2 ha ka minit ba 32 bad u Timmy Ryngkhlem Jersey No-7 ha ka minit 49. Na ka liang Ammutong kala pyrshang ban pynphai ïa kitei ki kol hynrei kala ïoh ban thep ïa ka kol kaba ar ha ka minit ba 60+1 lyngba u Primrose Lamat Jersey No-8. Haduh ba kut jong ka por ïakhun ka War Jaiñtia Teacher kala long syndon ka lahduh jong kane ka lympung mynta u snem da kaba jop 3-2 kol.
Ïa ka nam Top Scorer la ïoh da u Marshal Nongrum, Best Gold Keeper la ïoh da u Shkeh Mylliem, Player of the Tournament la ïoh da u Kynjai Tariang baroh kine ki lai ngut ki dei na ka kynhun jong ka Ammutong SC. Ha kane ka sngi la pynkup burom ïa u Phrangki Buam uwei u rangïalehkai ba paw ka thaiñ.
Ka kynhun ba ïoh rah ïa ka nam lahduh (winner) kaba la ïoh rong ïa ka song pisa kaba 50,000/- hajar tyngka lem bad ka trophy, katba ka kynhun ba wan ba ar (Runner up) kala ïoh 20,000/- hajar tyngka lem bad ka trophy.
La pynphuh pynphieng shuh shuh ïa kane ka jingïakhun phainal da ka jingshad bala shim bynta da ki khun samla jong ka shnong, baroh ki teams kiba la wan ïashim bynta ha kane lympung ki don haduh 16 tylli.
