Ha ka jingwan ïuhkjat u Jagdeep Dhankhara Vice President jong ka Ri India, ha ka jylla hynne ka sngi ka 16 Tarik Risaw, u la buh mawnongrim ia ka ‘Meghalaya Skill and Innovation Hub’ , ha ka jingiadonlang u Lat ka jylla u C.H Vijayashankar, u Myntri Rangbah ka jylla u Conrad K Sangma bad ka myntri ka koit ka khiah ka kong Ampareen Lyngdoh bad Kiwei Kiwei .
U Vice President u la plie paidbah ruh ïa ka CM Business Catalyst: Student B-Plan Challenge bad ka IIM Shillong bad ka jingïasoi ïa ka Mou hapdeng ka UNDP bad ka Govt of Meghalaya halor ka jingkyntiew ïa ka kam seng kam seng jam.
Ia ka Meghalaya Skill and Innovation Hub yn shna ha ka jaka kaba 6.54 akar ha New Shillong ha ka jinglut kaba Rs. 77.5 Klur. Kane ka jaka kan pynbiang ia ka jingdonkam jong ki samla na ka bynta ka jingpynmih, jinghikai bad ka jingiatreilang ha ki karkhana.
Haba kren ha kane ka sngi, u Vice President ka Ri India, u Jagdeep Dhankhar u la iaroh ia u myntri rangbah ka jylla u Conrad K Sangma na ka bynta ka jingiarap bapher bapher ka ban pynroi ia ka sap jong ki samla nongshong shnong ka jylla.
U la ong ba ka kam kaba ha khlieh duh jong ka ri u President ka ri India la bat da ka kynthei, kaba dei ka Riewlum bad ka DGP kynthei ba nyngkong eh jong ka Meghalaya kaba dei ka riewlum ka leit sha ka lynti kaba jngai ban pyni ia ka jingkylla jong ka roi ka par jong ka ri India.
U la ong ba ka Skill and Innovation Hub kan iaid lynti jngai ha kaba kyntiew ia ka kam seng kam seng jam ha ka jylla. U la kyrmen ruh ba ka Human Resources jong ka jylla kan ioh ka jingkyrshan da ka jingdon ia kane ka centre.
“Ka jingtbit jong ki samla ka dei ka jingdonkam jong ka por”, da kaba kdew ba u Myntri Rangbah duh ka ri u Narendra Modi u la plie ia ka jingkhang jong ki lad ki lynti na ka bynta ki samla lyngba ki Skilling bad ki Startup Prokram bapher bapher.
U la pyntip ruh ba la mang 60,000 Cr na ka bynta ban pyntbit ia ki 5lak ngut ki samla ha ki san snem ban wan ha ka ri. “Ka jingpyn kupbor ïa ki samla kan pynthikna ïa ka jingkiew kaba khraw ha ka ïoh ka kot ha ka ri.
Haba kren ha kane ka sngi, u Myntri Rangbah ka Jylla u la ong ba ka jingdon ki samla jong ka Meghalaya ka dei ka bor jong ka.
U la ong ba ka Sorkar ka kyrshan ia ka kam seng kam seng jam ha ka rukom kaba heh, bad ban weng ia ka jingdonkam jong ka jingduna bor briew la buh ia ka jaka ai jingtbit bad jingpynmih jingmut.
“85 percent na ki nongshong shnong jong ngi ki don hapoh ka rta kaba 45. Ki samla ki dei ka bor bad ka jingdon jingem kaba khraw tam jong ngi bad ngi la sdang ïa ki prokram kiba pynpoi ïa ka bor jong ki samla jong ngi”, ong u Myntri Rangbah ka Jylla.
U la ong shuh shuh ba ka sorkar ka don ki prokram bapher bapher lyngba kiba la ai jinghikai ia ki samla, khnang ba kin lah ban noh synniang kaba pynmih jingmih na ka bynta ka jingroi jong ka jylla.
Haba kren halor ka jingkyntiew ia ki nongseng kam nongkyndong, u Myntri rangbah u la ong ba ka sorkar ka pynlong ia ki jingiakop Business Plan bapher bapher bad ka kyrshan ia ki nongseng kam.
“Ngi ai jingkyrshan bad bat kti ïa ki nongseng kam jong ngi lyngba ki prokram kum ka CM Elevate, bad ai jingïarap pisa”, u la bynrap.
