Ki Nonghikai hapoh ka shatri jong ka All Meghalaya SSA Teachers Association (AMSSTA) hapoh ka jingialam jong u Vice President ka kynhun u Bah D. Lamare u la kren sha ki lad pathai khubor mynta ka janmiet ka 16 tarik Risaw hadien ba la wan kynduh ia u Commissioner Secretary ka tnad pule puthi bad ia u Myntri ka tnad pule puthi u Rakkam A Sangma.
U la pyntip ba mynta la kumba 8 snem ka sorkar ka leh matlah bad ka pynbor ia ngi ban mih sha madan sha surok namar ka sngap mynthi ia ka jingdawa jong ngi ban pynkiew noh ia ka tulop mynta la 8 snem kynthih.
Shuh shuh u la ong ba kum ki nonghikai ka mynsiem ki don sha skul kim don kano kano ka jingshun ia ki khynnah skul ki nongpyniaid skul, ki kmie ki kpa jong ki khynnah skul hynrei ki mih sha surok ban iakhih ban dawa ia ka tulop. Lada ka sorkar ka pynkiew tang 5 percent lane 10 percent ruh ka la biang ym ba ngi dawa beit ia ka 100 percent.
U la pyntip ruh ba ka sorkar ka ai daw bym don pisa bad ki tax ki khajna baroh ki leit lut sha ka sorkar bad ka sorkar ka don pisa ban siew ia ki Consultant, ki Chairman ki Co-Chairman, ia ki nonghikai pat ki ai daw bym don pisa. Ka fund ban pynlut sha ka Education marwei kam don katkum ki rule la kumno kumno 6 percent na ka GDP ka dei ban leit sha ka pule puthi hynrei kam don.
Ha ka jingkren ba khatduh u la ong ngin dang pynjur shuh shuh ia ki jingiakhih bad ngin sa pynlong ki jingiakhih ha kylleng ka District bad ka jingiakhih kaba heh ngin sa pynlong ha Tura. Haduh mynta ruh ngim pat ioh ban iakynduh ia u Myntri Rangbah bad ngin pyrshang ban kynduh ia u Myntri Rangbah haba iadei bad kine ki jingeh jong ngi kum ki Nonghikai.